این سی پی-ایس پی رکن سازی، تنظیمِ نو اور انتخابی حکمتِ عملی پر زور
ممبئی میں پارٹی کی ریاستی سطح کی میٹنگ، بدعنوان حکومت کے خلاف مہم تیز کرنے کا اعلان
ممبئی: نیشنلسٹ کانگریس پارٹی شردچندر پوار کی ایک اہم ریاستی سطح کی میٹنگ آج ممبئی میں پارٹی کے ریاستی صدر جناب جینت پاٹل کی صدارت میں منعقد ہوئی، جس میں ریاست بھر سے پارٹی کے سینئر رہنماؤں اور عہدیداران نے شرکت کی۔ میٹنگ میں آئندہ کارپوریشن و بلدیاتی اداروں کے انتخابات کے پیش نظر انتخابی تیاریوں، تنظیمی استحکام اور رکن سازی مہم پر تفصیلی غور کیا گیا۔
پارٹی کے ترجمان مہیش تاپسے نے میڈیا کو بتایا کہ میٹنگ میں پارٹی کی داخلی سرگرمیوں کو متحرک کرنے کے لیے نئی حکمتِ عملی طے کی گئی ہے، اور نوجوانوں، خواتین اور نئی نسل کے کارکنوں کو پارٹی سے جوڑنے پر خاص زور دیا گیا ہے۔ اُن کے مطابق، ریاست بھر میں پارٹی میں نیا جوش اور اتحاد پیدا ہوا ہے، جو میٹنگ میں نمایاں طور پر محسوس کیا گیا۔
اس موقع پر پارٹی کے ریاستی صدر جناب جینت پاٹل نے خطاب کرتے ہوئے واضح کیا کہ پارٹی نے بوتھ سطح پر تنظیم کو مضبوط کرنے کا فیصلہ کیا ہے، تاکہ آئندہ بلدیاتی انتخابات میں بہتر کارکردگی ممکن ہو سکے۔ انہوں نے کہا کہ موجودہ حکومت کے دور میں بدعنوانی سرکاری اداروں میں جس حد تک پھیل چکی ہے، اس کا پردہ فاش کرنا پارٹی کی اولین ترجیح ہے، اور کارکنان کو اس ذمہ داری کے لیے تیار رہنا ہوگا۔
انہوں نے مزید کہا کہ پارٹی کی نوجوان اور خواتین ونگ کو مزید مستحکم کرنے کے لیے اقدامات کیے جائیں گے، تاکہ نئی قیادت کو اُبھارا جا سکے۔ ریاست بھر میں سینئر قائدین کے دورے ہوں گے، جس کے دوران تعلقہ اور ضلع سطح پر تنظیمی حالت، کارکنان کی سرگرمی اور حکومتی اسکیمات کے نفاذ کا جائزہ لیا جائے گا۔
جناب جینت پاٹل نے عندیہ دیا کہ پارٹی میں جلد ہی تنظیمِ نو کی جائے گی، نئی تقرریاں اور ذمہ داریاں دی جائیں گی، تاکہ کارکنان میں نیا حوصلہ پیدا ہو۔ انہوں نے کہا کہ کسانوں کے مسائل، نوجوانوں میں بے روزگاری اور عوامی زندگی کو درپیش مسائل پر پارٹی کی توجہ مرکوز رہے گی۔
مہیش تاپسے نے کہا کہ یہ میٹنگ مہاراشٹر کی عوام سے ہماری وابستگی کا مظہر ہے۔ شرد پوار صاحب اور جینت پاٹل کی قیادت میں ہمارا گروپ ایک مضبوط، فعال اور عوامی مسائل سے جڑی پارٹی کے طور پر ابھر رہا ہے۔ ہم عوامی مسائل کے لیے سڑکوں پر اتریں گے اور انصاف، ترقی اور جمہوریت کے تحفظ کے لیے پرعزم ہیں۔