انتخابی نتائج میں دھاندلی؟ نانا پٹولے نے الیکشن کمیشن سے وضاحت طلب کی
ممبئی: ودھان سبھا انتخابات میں ووٹنگ کے فیصد میں غیرمعمولی اضافے پر عوامی حلقوں میں شکوک و شبہات جنم لے رہے ہیں۔ ووٹوں میں 7.83 فیصد اضافے کی وجہ سے دھاندلی کا الزام شدت اختیار کر رہا ہے۔ الیکشن کمیشن کی جانب سے جاری کردہ اعداد و شمار کے مطابق، پولنگ کے دن شام 5 بجے کے بعد پولنگ مراکز پر غیر معمولی طور پر لمبی قطاریں ہونی چاہیے تھیں۔
ریاستی کانگریس صدر نانا پٹولے نے الیکشن کمیشن کو ایک خط لکھ کر مطالبہ کیا ہے کہ ریاست کے ان حلقوں کا ویڈیو ثبوت فراہم کیا جائے جہاں شام 5 بجے کے بعد ووٹنگ کی شرح میں اضافہ ہوا۔خط میں نانا پٹولے نے نشاندہی کی کہ کمیشن کے جاری کردہ سرکاری اعداد و شمار کے مطابق، 20 نومبر کی رات 11:30 بجے تک ووٹنگ کی شرح 65.2 فیصد تھی، جبکہ اگلے دن یعنی 21 نومبر کو دوپہر 3 بجے یہ شرح بڑھ کر 66.05 فیصد ہو گئی۔ انہوں نے سوال اٹھایا کہ یہ 1.03 فیصد اضافہ کیسے ممکن ہوا؟ ایک دن میں 9,99,359 ووٹوں کا اضافہ کیوں اور کیسے ہوا؟
انہوں نے مزید کہا کہ یہ معاملہ نہایت سنگین اور تشویشناک ہے۔ اگر عوام کے ذہنوں میں شک پیدا ہو رہا ہے تو یہ الیکشن کمیشن کی ذمہ داری ہے کہ وہ مکمل وضاحت کے ساتھ ان شکوک کو دور کرے۔ نانا پٹولے نے مطالبہ کیا کہ کمیشن فوری طور پر اپنی پوزیشن واضح کرے اور شفافیت کا مظاہرہ کرتے ہوئے عوامی اعتماد بحال کرے۔
