’نوکری دو، نہیں تو بھتہ دو‘ این ایس یو آئی کا ریاست گیر احتجاجی مہم کا اعلان
ہر سال دو کروڑ نوکریوں کا وعدہ کرنے والے اب 18 کروڑ روزگار چھیننے کے ذمہ دار: ہرش وردھن سپکال
ممبئی: بی جے پی۔مہایوتی حکومت کے دورِ اقتدار میں بے روزگاری کی شرح خطرناک حد تک بڑھ چکی ہے اور سرکاری بھرتیاں تقریباً مکمل طور پر بند ہو گئی ہیں۔ انتخابی مہم کے دوران نوجوانوں کو روزگار، وظیفے اور مختلف سہولتوں کے خواب دکھائے گئے تھے، مگر اقتدار میں آتے ہی بی جے پی۔مہایوتی نے اپنے تمام وعدے توڑ دیے۔ نوجوانوں کے ساتھ اس بدترین دھوکے کے خلاف اب این ایس یو آئی نے جارحانہ مہم چھیڑنے کا اعلان کیا ہے۔ ’نوکری دو، نہیں تو بھتہ دو، ورنہ استعفیٰ دو‘ کے نعرے کے ساتھ یہ تحریک پورے مہاراشٹر میں چلائی جائے گی۔
اس مہم کا اعلان آج ممبئی کے تلک بھون میں منعقدہ پریس کانفرنس کے دوران کیا گیا۔ اس موقع پر مہاراشٹر کانگریس کے صدر ہرش وردھن سپکال، قانون ساز کونسل میں قائدِ حزبِ اختلاف ستیج عرف بنٹی پاٹل، کانگریس کے ریاستی انچارج بی ایم سندیپ، سابق وزیر اور ایم ایل اے امیت دیشمکھ، کانگریس ورکنگ کمیٹی کے رکن نسیم خان، سابق ریاستی صدر مانک راؤ ٹھاکرے اور این ایس یو آئی کے ریاستی صدر ساگر سالُنکے موجود تھے۔
اس موقع پر خطاب کرتے ہوئے ریاستی کانگریس صدر ہرش وردھن سپکال نے کہا کہ 2014 میں نریندر مودی نے اقتدار میں آتے وقت ہر سال دو کروڑ نوکریاں دینے کا وعدہ کیا تھا، لیکن حقیقت یہ ہے کہ بی جے پی حکومت نے نہ صرف نئی نوکریاں دینے میں ناکامی دکھائی بلکہ گزشتہ دس برسوں میں 18 کروڑ روزگار ختم کر ڈالے۔ انہوں نے کہا کہ بی جے پی حکومت نے نوجوانوں کے ساتھ ناقابلِ معافی دھوکہ کیا ہے۔ یہ صرف ووٹ چور نہیں بلکہ روزگار چور حکومت ہے اور اب وقت آگیا ہے کہ نوجوان اس کے خلاف متحد ہوں۔
این ایس یو آئی کے ریاستی صدر ساگر سالُنکے نے کہا کہ بی جے پی نے انتخابات میں نوجوانوں کو نوکری، دس ہزار روپے ماہانہ بے روزگاری بھتہ اور ایپرنٹس شپ کے مواقع دینے کا وعدہ کیا تھا، مگر ان میں سے ایک بھی وعدہ پورا نہیں ہوا۔ طلبہ کو وظائف نہیں مل رہے، اعلیٰ تعلیم یافتہ نوجوان ہاتھ پر ہاتھ دھرے بیٹھے ہیں۔ اب این ایس یو آئی ریاست بھر میں بی جے پی حکومت سے جواب طلب کرے گی اور نوجوانوں کو ان کے حق کے لیے منظم کرے گی۔ انہوں نے کہا کہ یہ تحریک صرف سیاسی نہیں بلکہ سماجی بیداری کی تحریک ہے، جو نوجوانوں کے مستقبل اور عزتِ نفس کی بحالی کے لیے چلائی جائے گی۔
MPCC Urdu News 12 November 25.docx