گیٹ آف انڈیا حادثے کے بعد تھانے میونسپل کمشنر کے سخت اقدامات
بوٹنگ کے تالابوں میں حفاظتی تدابیر پر عمل لازمی قرار
(تھانے: آفتاب شیخ)
گزشتہ روز گیٹ آف انڈیا سے ایلفنٹا جانے والی فیری کے حادثے میں 14 افراد کی المناک ہلاکت نے تفریحی مقامات پر حفاظتی اقدامات کی اہمیت کو مزید اجاگر کیا ہے۔ اس حادثے کے بعد تھانے میونسپل کمشنر سوربھ راو نے سخت احکامات جاری کیے ہیں، جن کے تحت تھانے میونسپل حدود میں واقع تمام تالابوں، جہاں بوٹنگ کی سہولت دستیاب ہے، پر سخت حفاظتی تدابیر لاگو کی جائیں گی۔
تھانے میونسپل حدود میں 35 تالاب موجود ہیں، جن میں ماسوندا، اپون، اور امبے گھوسالے مرکزی حیثیت رکھتے ہیں۔ ان تالابوں میں پیڈل بوٹس اور مشینی بوٹس کی سہولت فراہم کی گئی ہے۔ یہ مقامات تھانے اور آس پاس کے علاقوں سے آنے والے شہریوں کے لیے تفریحی مراکز کے طور پر مشہور ہیں، جہاں لوگ اہل و عیال کے ساتھ آکر بوٹنگ سے لطف اندوز ہوتے ہیں۔
ماسوندا تالاب میں 35 پیڈل بوٹس اور 2 مشینی بوٹس، اپون تالاب میں 16 پیڈل بوٹس اور 1 مشینی بوٹ، جبکہ امبے گھوسالے تالاب میں 4 پیڈل بوٹس اور 1 مشینی بوٹ دستیاب ہیں۔ ان تمام سہولیات کی نگرانی کے لیے ٹھیکیدار مقرر کیے گئے ہیں۔
کمشنر سوربھ راو نے ہدایت دی ہے کہ بوٹنگ کے دوران تمام شہریوں کے لیے سیفٹی جیکٹ پہننا لازمی ہوگا۔ جو افراد اس ہدایت پر عمل نہیں کریں گے، انہیں بوٹنگ کی اجازت نہیں دی جائے گی۔ تمام کشتیوں میں حفاظتی جیکٹس، بویاز رنگ، اور رسی کی موجودگی کو یقینی بنایا جائے گا۔
ان احکامات پر عمل درآمد کے لیے ٹھیکیداروں کو خصوصی ہدایات دی گئی ہیں تاکہ کسی بھی قسم کے حادثے کو روکا جا سکے۔
آج ماحولیات کے ڈپٹی کمشنر ڈاکٹر پدمشری بیناڈے اور چیف انوائرمینٹل آفیسر منیشا پردھان نے ماسوندا، اپون، اور امبے گھوسالے تالابوں کا دورہ کیا۔ انہوں نے حفاظتی انتظامات کا تفصیلی جائزہ لیا اور متعلقہ افراد کو سختی سے ہدایت دی کہ بوٹنگ کے دوران کسی بھی قسم کی غفلت نہ کی جائے۔
کمشنر سوربھ راو نے عوام سے اپیل کی ہے کہ وہ میونسپل کارپوریشن کی جانب سے جاری کردہ حفاظتی ہدایات پر عمل کریں تاکہ تفریح محفوظ اور خوشگوار بنائی جا سکے۔ حادثات سے بچنے کے لیے حفاظتی اقدامات کی اہمیت کو سمجھنا اور ان پر عمل کرنا سب کی ذمہ داری ہے۔
