گھوڈبندر روڈ پر بیچنگ پلانٹ کے خلاف مکینوں کا احتجاج، فوری بندش کا مطالبہ
انتظامیہ کی خاموشی پر مکین سراپا احتجاج، سڑکوں پر نکلنے کی دھمکی
تھانے، (آفتاب شیخ)
تھانے کے گھوڈبندر روڈ کے بوریویڈے گاؤں میں قائم ریڈی مکس کنکریٹ (RMC) بیچنگ پلانٹ کے خلاف مکینوں کا غم و غصہ شدت اختیار کر گیا ہے۔ گردوغبار، شور کی آلودگی، ٹریفک مسائل اور صحت پر مضر اثرات کے باعث شہریوں نے فوری کارروائی کا مطالبہ کرتے ہوئے بڑے پیمانے پر احتجاج کی دھمکی دی ہے۔
متعدد شکایات کے باوجود انتظامیہ کی عدم توجہی مکینوں کے صبر کا امتحان لے رہی ہے۔ مکینوں نے الزام عائد کیا ہے کہ پلانٹ سے اٹھنے والی گردوغبار سے بچوں، ضعیف افراد اور مریضوں کو سانس لینے میں مشکلات کا سامنا ہے۔ مزید برآں، صبح آٹھ بجے سے رات نو بجے تک جاری رہنے والے کام نے ان کی روزمرہ زندگی کو بری طرح متاثر کیا ہے۔
شیو سینا کے مقامی رہنما روی گھرت نے معاملے پر سخت مؤقف اختیار کرتے ہوئے پولیس اسٹیشن میں شکایت درج کرائی ہے اور مطالبہ کیا ہے کہ بیچنگ پلانٹ کا کام فوری طور پر محدود کیا جائے، بصورت دیگر احتجاج ناگزیر ہوگا۔ اس موقع پر سب ڈویژن ہیڈ منگیش کدم، دیگر عہدیداران، سوسائٹی ممبران اور کمیٹی کے نمائندے بھی موجود تھے۔
روناک ڈیلائٹ، وہانگ ویلی فیز I اور II، پلاٹینم لان، راونک ہائٹس H1 اور اننتی گرین G1 سے G4 کے مکینوں نے اس تحریک کی مکمل حمایت کا اعلان کیا ہے اور واضح کیا ہے کہ اگر فوری اجلاس طلب کرکے کوئی حل پیش نہ کیا گیا تو سڑک بند اور بڑے احتجاج کی حکمت عملی اختیار کی جائے گی۔
مکینوں نے خبردار کیا ہے کہ "صحت سے کھلواڑ مزید برداشت نہیں کیا جائے گا۔" اب یہ دیکھنا باقی ہے کہ انتظامیہ اس مسئلے پر کیا کارروائی کرتی ہے، جبکہ تھانے بھر کی توجہ اس احتجاج پر مرکوز ہے۔
