پربھنی (ورق تازہ نیوز): پربھنی شہر کے اردو میڈیم ہائی اسکولوں کے دسویں جماعت کے فروری 2025 کے بورڈ امتحانات کے نتائج کا اعلان کردیا گیا ہے۔ اس سال کئی اسکولوں نے شاندار کامیابی درج کی ہے، جس سے تعلیمی میدان میں اردو میڈیم اداروں کی محنت اور لگن کا واضح ثبوت ملتا ہے۔
فاران اردو ہائی اسکول نے اس سال سب سے اعلیٰ کارکردگی کا مظاہرہ کرتے ہوئے %98.59 نتائج کے ساتھ پہلا مقام حاصل کیا۔ اس کے بعد نیشنل اردو ہائی اسکول نے %97.95 اور انعم اردو ہائی اسکول (پیڑگاؤں) نے %97.82 کے ساتھ بالترتیب دوسرے اور تیسرے مقام پر جگہ بنائی۔
دیگر نمایاں کارکردگی درج کرنے والے اسکولوں میں سونیا گاندھی اردو ہائی اسکول (%97.01)، الکریم ہائی اسکول (%96)، معصوم اردو ہائی اسکول (%95.23)، مؤیدالمسلمین ہائی اسکول (%95.16)، اندرا گاندھی گرلز اردو ہائی اسکول (%94.55) اور ڈاکٹر اے پی جے عبدالکلام ہائی اسکول (%94.44) شامل ہیں۔
کچھ اسکولوں کو نتائج میں بہتری کی ضرورت محسوس کی گئی ہے، جن میں صہیب اردو ہائی اسکول نے %55.55 کے ساتھ سب سے کم نتائج حاصل کیے۔ سر سید احمد اردو ہائی اسکول (%69.23) اور ڈاکٹر محمد اقبال اردو ہائی اسکول (%75) کو بھی نتائج میں بہتری کی طرف توجہ دینی ہوگی۔
ان نتائج سے ظاہر ہوتا ہے کہ پربھنی کے اردو میڈیم اسکول تعلیمی معیار میں مسلسل بہتری کی طرف گامزن ہیں۔ والدین، اساتذہ اور طلبہ کی مشترکہ محنت قابلِ ستائش ہے۔ تعلیمی میدان میں مزید ترقی کے لیے تمام اداروں کو اپنی کوششیں جاری رکھنے کی ضرورت ہے۔