چنئی: ڈی ایم کے نے تمل ناڈو میں حکمراں اے آئی اے ڈی ایم کے زیر قیادت مورچہ کے امیدوار کو شکست دے کر ویلور لوک سبھا نشست 8411 ووٹوں سے کامیابی حاصل کی ہے۔ ڈی ایم کے کے کاتھر آنند کو 485340 ووٹ ملے اور شکست خوردہ امیدوار شنموگم کو 477199 ووٹ حاصل ہوئے۔ ڈی ایم کے نے یہ نشست اے آئی اے ڈی ایم سے چھینی ہے۔
ویلور لوک سبھا سیٹ کے لئے 5 اگست کو ہونے والے انتخاب کے لئے 28 امیدوار تھے ، لیکن اصل مقابلہ شنمونگم اور کاتھر کے مابین تھا۔ ڈی ایم کے خزانچی اور سابق وزیر تعمیرات دورئی مورگن کے بیٹے کاتھر کو کل 4،85،340 ووٹ ملے جبکہ شنموگم نے 4،77،199 ووٹ حاصل کیے۔ نام تمیز کاٹچی امیدوار دیپالکشمی نے 26،995 ووٹ حاصل کیے اور وہ تیسرے نمبر پر رہے۔ باقی امیدوار وں کی ضمانت ضبط ہوگئی۔
ویلور کی نشست سے تیسری بار انتخاب لڑنے والے شنموگم سن 1984 میں منتخب ہوئے تھے۔ اس سے قبل انہوں نے 1980 میں ارنی اسمبلی کی نشست سے الیکشن جیتا تھا۔ ویلور میں 18 اپریل کودیگر لوک سبھا کی نشستوں کے ساتھ انتخاب ہونا تھا ، لیکن آنند اور ایک ڈی ایم کے کارکن کی رہائش گاہ سے بڑی رقم برآمد ہونے کی وجہ سے یہ انتخاب منسوخ کردیا گیا تھا۔
آنند کی فتح کے بعد ، خواتین سمیت ڈی ایم کے کارکنوں کی ایک بڑی تعداد پارٹی ہیڈ کوارٹر پہنچی اور پٹاخے چھوڑ کر مٹھائی تقسیم کی۔ بہت سے کارکنان الورپیٹ میں پارٹی صدر ایم کے اسٹالن کی رہائش گاہ پہنچ گئے اور انہوں نے جیت کی خوشی کا اظہار کیا۔
بعد میں آنند نے ویلور ڈسٹرکٹ کلکٹر اور ریٹرننگ آفیسر شنموگاسندرم سے انتخابی سرٹیفکیٹ حاصل کیا۔
یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-