ناندیڑ:(ورق تازہ نیوز) — ضلع ناندیڑ میں چوری اور گھر پھوڑنے کی وارداتوں میں ملوث بین اضلاعی ملزمان کے خلاف مقامی کرائم برانچ نے بڑی کارروائی کرتے ہوئے دو ملزمان کو گرفتار کر لیا، جبکہ ایک لاکھ 6 ہزار 500 روپے مالیت کا مسروقہ سامان برآمد کر لیا گیا۔پولیس کے مطابق یہ کارروائی پولیس اسٹیشن لوہا، کندھار، ہیمایت نگر، ایئرپورٹ، ناندیڑ رورل اور ضلع بلڈھانہ کے دیؤلگاؤں راجہ علاقوں میں درج متعدد چوری اور گھر پھوڑنے کے مقدمات کی تفتیش کے دوران عمل میں آئی۔پولیس کو خفیہ اطلاع ملی تھی کہ چوری کی وارداتوں میں ملوث ملزمان موٹر سائیکل پر مشتبہ حالت میں گھوم رہے ہیں اور ان کے پاس مسروقہ نقد رقم موجود ہے۔
اس اطلاع پر مقامی کرائم برانچ کی ٹیم نے 9 مئی 2026 کو ناندیڑ رورل پولیس اسٹیشن حدود میں مودی گراؤنڈ کے قریب جال بچھا کر دو ملزمان کو حراست میں لیا۔گرفتار ملزمان کی شناخت دیپ سنگھ کشور سنگھ تلپتیا (19) اور مہندر سنگھ عرف سنی دیویندر سنگھ بھوسی والے (19) ساکنان سکھوجی نگر، ناندیڑ کے طور پر ہوئی ہے، جبکہ ان کے ایک ساتھی جوگیدر سنگھ ٹاک عرف چوہان (ساکن وسماٹ، ضلع ہنگولی) کی تلاش جاری ہے۔دورانِ تفتیش ملزمان نے اعتراف کیا کہ انہوں نے اپنے تیسرے ساتھی کے ساتھ مل کر لوہا، قندھار، حمایت نگر، ایئرپورٹ، ناندیڑ رورل اور دیؤلگاؤں راجہ (ضلع بلڈھانہ) میں چوری اور گھر پھوڑنے کی کئی وارداتیں انجام دی ہیں۔
پولیس نے ملزمان کے قبضے سے ایک موٹر سائیکل (نمبر MH 26 AH 2918) اور نقد رقم برآمد کرتے ہوئے کل 1,06,500 روپے کا مال ضبط کیا ہے۔ بعد ازاں دونوں ملزمان کو مزید تفتیش کے لیے پولیس اسٹیشن لوہا کے حوالے کر دیا گیا ہے۔یہ کارروائی پولیس سپرنٹنڈنٹ ناندیڑ اویناش کمار، ایڈیشنل ایس پی ارچنا پاٹل اور سورج گروو کی رہنمائی میں، پولیس انسپکٹر اتل بھوسلے، سب انسپکٹر سائناتھ پویڈ اور ان کی ٹیم نے انجام دی۔پولیس سپرنٹنڈنٹ نے اس کامیاب کارروائی پر پوری ٹیم کی کارکردگی کو سراہتے ہوئے ان کی حوصلہ افزائی کی ہے۔