ناندیڑ، 6 مئی:( ورق تازہ نیوز)علاقائی محکمہ موسمیات ممبئی کی جانب سے جاری کردہ اطلاع کے مطابق ناندیڑ ضلع میں 7 مئی 2026 کے لیے ایک روزہ یلو الرٹ جاری کیا گیا ہے۔
محکمہ موسمیات کے مطابق ضلع کے مختلف مقامات پر 40 سے 50 کلومیٹر فی گھنٹہ کی رفتار سے تیز ہوائیں چلنے، گرج چمک اور بجلی کی کڑک کے ساتھ درمیانی درجے کی بارش ہونے کا امکان ہے۔ ضلعی انتظامیہ نے اس ممکنہ موسمی صورتحال کے پیش نظر متعلقہ اداروں اور شہریوں سے احتیاطی تدابیر اختیار کرنے کی اپیل کی ہے۔
احتیاطی تدابیر (کیا کریں)
خراب موسم کی پیشگوئی ہو تو غیر ضروری طور پر باہر نکلنے سے گریز کریں۔
اگر کھلے میدان میں ہوں اور کوئی محفوظ عمارت نہ ہو تو نشیبی جگہ پر بیٹھ کر سر کو گھٹنوں میں لے لیں۔
آسمانی بجلی کے دوران گھر یا محفوظ عمارت میں پناہ لیں۔
گھر کی بالکنی، چھت یا باہر کے حصوں میں کھڑے نہ رہیں۔
گھر کے برقی آلات فوری بند کر دیں۔
بجلی کے کھمبوں، تاروں اور دھاتی اشیاء سے دور رہیں۔
پانی میں کھڑے ہوں تو فوراً باہر نکل جائیں۔
احتیاطی تدابیر (کیا نہ کریں)
آسمانی بجلی کے دوران لینڈ لائن فون استعمال نہ کریں۔
شاور کے نیچے نہ نہائیں۔
پانی کے نل، پائپ لائن یا برقی آلات کو ہاتھ نہ لگائیں۔
آندھی اور بجلی کے دوران دھاتی شیڈ یا ٹینٹ میں پناہ نہ لیں۔
اونچے درختوں یا دھاتی ٹاورز کے قریب نہ کھڑے ہوں۔
گھر کے اندر ہوتے ہوئے کھڑکی یا دروازے سے بجلی گرتے دیکھنے کی کوشش نہ کریں۔
ضلعی انتظامیہ نے شہریوں سے اپیل کی ہے کہ وہ ہدایات پر عمل کریں اور کسی بھی ہنگامی صورتحال میں فوری طور پر متعلقہ محکموں سے رابطہ کریں۔