ناندیڑ (ورق تازہ نیوز): ناندیڑ ضلع کے مختلف پولیس تھانوں میں درج سنگین مقدمات کے مطلوب اور فرار ملزمان کی گرفتاری کے لیے پولیس سپرنٹنڈنٹ ڈاکٹر نیلاب روہن کی ہدایت پر خصوصی مہم جاری ہے۔ اسی مہم کے تحت وزیرآباد جرائم تفتیشی دستے نے قتل کی کوشش کے معاملے میں فرار ملزم کو واقعے کے 24 گھنٹے کے اندر گرفتار کرلیا۔پولیس کے مطابق 10 ستمبر 2026 کو شکایت کنندہ اکشے لکشمن ڈوبوکواڑ، عمر 20 سال، ساکن نوین حسّاپور، بھیو گلی، واگھی روڈ، ناندیڑ، اپنے دوست کے ساتھ وزیرآباد مارکیٹ کے علاقے میں کھڑے تھے۔
اسی دوران پرانی گاڑی کے تنازعے کی رنجش کو لے کر ملزم کارتک بھگوان بھیسے، ساکن ناندیڑ، نے پیچھے سے آکر اکشے پر جان سے مارنے کی نیت سے چاقو سے حملہ کردیا۔چاقو کے حملے میں اکشے کے دائیں ہاتھ اور ٹانگ پر گہرے زخم آئے، جس کے بعد انہیں علاج کے لیے سرکاری اسپتال وشنو پوری میں داخل کرایا گیا، جہاں ان کا علاج جاری ہے۔ واقعے کے بعد شکایت کنندہ کے بیان پر وزیرآباد پولیس اسٹیشن میں ملزم کے خلاف جرم نمبر 464/2026 کے تحت بھارتیہ نیائے سنہتا کی دفعہ 109(1) کے تحت مقدمہ درج کیا گیا تھا۔واقعے کی اطلاع ملتے ہی پولیس سپرنٹنڈنٹ ڈاکٹر نیلاب روہن کی ہدایت اور سینئر افسران کی رہنمائی میں وزیرآباد پولیس اسٹیشن کے جرائم تفتیشی دستے نے فوری طور پر ملزم کی تلاش شروع کردی۔
خفیہ معلومات اور تکنیکی ذرائع کی مدد سے مختلف مقامات پر تلاش کے بعد پولیس نے فرار ملزم کارتک بھگوان بھیسے، عمر 18 سال، ساکن پنچ شیل نگر، کھڑک پورہ، ناندیڑ، کو گرفتار کرلیا۔گرفتار ملزم کو عدالت میں پیش کیا گیا، جہاں عدالت نے اسے 14 ستمبر 2026 تک 3 دن کے پولیس کسٹڈی ریمانڈ پر بھیج دیا ہے۔ معاملے کی مزید تفتیش اسسٹنٹ پولیس انسپکٹر ترنر کررہے ہیں۔ یہ کارروائی پولیس سپرنٹنڈنٹ ڈاکٹر نیلاب روہن کی ہدایت پر ایڈیشنل پولیس سپرنٹنڈنٹ سورج گورَو کی رہنمائی میں پولیس انسپکٹر اجیت کمبھار کی قیادت میں پولیس سب انسپکٹر سنیل بلونگے اور پولیس اہلکار شیو سام مٹھپتی، بھاؤ صاحب راٹھوڑ، ولاس کدم، ایمان پٹھان، سنتوش پاوڑے، سنتوش پوکلے، جوالا سنگھ باوری اور سنتوش گونڈگے نے انجام دی۔ تمام اہلکار وزیرآباد پولیس اسٹیشن سے وابستہ ہیں۔