لکھنؤ: باراتیوں سے بھری گاڑی نہر میں گری، 7 بچّے لاپتہ

اتر پردیش کے لکھنؤ میں باراتیوں سے بھری ایک گاڑی اندرا نہر میں گر گئی۔ اس حادثہ میں 22 لوگوں کو بچا لیا گیا جب کہ 7 بچے نہر میں بہہ گئے جن کی تلاش جاری ہے۔ بتایا جا رہا ہے کہ 29 باراتی پِک اَپ وین میں سوار تھے جو کہ جمعرات کی صبح حادثہ کا شکار ہوئے۔ باراتی شادی سے واپس لوٹ رہے تھے۔ واقعہ کی خبر ملتے ہی پولس موقع پر پہنچی اور راحتی کام شروع کر دیا۔

لکھنؤ رینج کے آئی جی ایس کے بھگت نے حادثہ کے تعلق سے میڈیا کو بتایا کہ ’’29 لوگوں کو لے جا رہی گاڑی نہر میں گر گئی اور اب تک 22 لوگوں کو بچا لیا گیا ہے۔ 7 بچے ہنوز لاپتہ ہیں۔ موقع پر این ڈی آر ایف اور غوطہ خوروں کے ذریعہ ریسکیو آپریشن جاری ہے۔‘‘

خبروں کے مطابق شادی کی تقریب میں شامل ہونے کے لیے فیملی کے رکن پِک اَپ وین میں بیٹھ کر گئے تھے اور پھر ان کی واپسی ہو رہی تھی۔ اس میں خاتون، مرد اور بچے شامل تھے۔ یہ سبھی بارہ بنکی کے لونی کٹرا تھانہ کے سرائے پانڈے گاؤں کے رہنے والے تھے۔ جیسے ہی باراتیوں سے بھری یہ گاڑی پٹوا گاؤں کے پاس اندرا نہر کے قریب پہنچی تو بے قابو ہونے کی وجہ سے نہر میں گر گئی۔ اس حادثہ کے بعد کسی طرح سے مرد اور خواتین باہر نکلنے میں کامیاب ہو گئے لیکن نصف درجن بچے اب بھی لاپتہ ہیں۔

اس واقعہ کا وزیر اعلیٰ یوگی آدتیہ ناتھ نے نوٹس لیا ہے۔ انھوں نے افسران کو فوری طور پر جائے حادثہ پر پہنچ کر راحتی کام کرنے اور باراتیوں کو ریسکیو کرانے کا حکم دیا ہے۔

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-