فرخ آباد: سزایافتہ مجرم نے 20 بچوں کو یرغمال بنایا، پولیس پر بم سے حملہ، حالات کشیدہ

فرخ آباد: اتر پردیش کے ضلع فرخ آباد کے محمد آباد کے گاؤں کرتھیا سے تقریباً 20 بچوں کو اغوا کر لینے کی سنسنی خیز خبر منظور عام پر آئی ہے۔ اطلاع موصول ہونے پر جب پولیس اہلکار نے اس گھر کے قریب جانے کی کوشش کی جہاں بچوں کو اغوا کر کے رکھا گیا ہے تو اغوا کرنے والے سر پھرے نے پولیس پر دستی بم سے حملہ کر دیا۔ حملہ کی وجہ سے کوتوال سمیت تین پولیس اہلکار زخمی ہو گئے۔

آخری اطلاع موصول ہونے تک پولیس سرپھرے سخص پر قابو کرنے سے قاصر ہے۔ پولیس سپرنٹنڈنٹ دیگر افسران متعدد تھانوں کی نفری کے ساتھ موقع پر پہنچ گئے ہیں۔ گاؤں میں خوف و ہراس کا ماحول ہے۔ یرغمال بنائے گئے بچوں کے والدین کا رو رو کر برا حال ہے۔

اترپردیش کے وزیر اعلی یوگی آدتیہ ناتھ نے ایک ہنگامی اجلاس طلب کیا ہے۔ جبکہ کانپور رینج کے آئی جی اس جگہ پر موجود ہیں جہاں بچوں کو یرغمال بنا کر رکھا گیا ہے۔

ایڈیشنل ڈائریکٹر جنرل آف پولیس پی وی راما شاستری نے خبر کی تصدیق کرتے ہوئے پی ٹی آئی کو بتایا، ’’کتھاریا گاؤں میں بیس بچوں کو یرغمال بنا کر رکھا گیا ہے۔‘‘

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – بشکریہ قومی آواز بیورو