سالِ نو پر صدر کووند، پی ایم مودی، ممتا بنرجی، راہل، پرینکا کی مبارکباد

نئے سال کا آغاز ہو چکا ہے اور مختلف سیاسی ہستیوں نے اس موقع پر لوگوں کو مبارکبادیاں پیش کی ہیں۔ 2020 کی آمد پر نیک خواہشات پیش کرنے والے کچھ اہم سیاسی شخصیات میں صدر جمہوریہ رام ناتھ کووند، پی ایم نریندر مودی، مغربی بنگال کی وزیر اعلیٰ ممتا بنرجی، کانگریس لیڈر راہل گاندھی، کانگریس جنرل سکریٹری پرینکا گاندھی شامل ہیں۔ ان شخصیات نے ٹوئٹ کے ذریعہ عوام کو نئے سال کی مبارکباد دی۔

صدر جمہورہی رام ناتھ کووند نے اپنے ٹوئٹ میں لکھا ہے کہ ’’نئے سال کی دل کی گہرائی سے مبارکباد۔ سال 2020 کی آمد اور نئی دہائی کی شروعات کے موقع پر ہم سب اپنے اس عزم کو دہرائیں کہ ہم ایک مضبوط اور ترقی یافتہ ہندوستان کی تعمیر کرنے کے لیے متحدہ ہو کر آگے بڑھیں گے۔‘‘ انھوں نے مزید لکھا ہے کہ ’’میری خواہش ہے کہ نیا سال آپ سبھی کی زندگی میں خوشحالی لائے۔‘‘

وزیر اعظم نریندر مودی نے 2020 میں چین سکون اور خوشحالی کی تمنا کرتے ہوئے ملک کے باشندوں کو نئے سال کی دلی مبارکباد پیش کی ہے۔ انھوں نے اپنے ٹوئٹ میں لکھا ہے کہ ’’2020 بہترین ہے، آپ کے لیے یہ سال خوشی اور کامرانی سے بھرا ہو۔ سبھی صحت مند ہوں اور سب کی امیدیں پوری ہوں‘‘۔ آخر میں پی ایم مودی نے لکھا ’’آپ سبھی کو سال 2020 کی دلی مبارکباد۔‘‘

مغربی بنگال کی وزیر اعلی ممتا بنرجی نے نئے سال 2020 کی مبارکباد پیش کرتے ہوئے کہا ہے کہ ’’آئیے ہم سب نئے سال کا آغاز ہریالی سے کریں۔‘‘ انھوں نے اپنے ٹوئٹ میں عوام کی خوشحالی کی دعا کرتے ہوئے لکھا ہے کہ ’’نیا سال 2020 نئی امیدکے ساتھ، ایک نیا سویرا اور سب کے لئے خوشی لے کر آیا ہے۔ نئے سال کی مبارکباد‘‘۔ اپنے اس ٹوئٹ کے ساتھ ممتا بنرجی نے ایک تصویر بھی ڈالی ہے جس میں لکھا ہوا ہے ’’ ہم اس برس کاآغاز ہریالی سے کریں۔ قدرت کو ہماری ضرورت ہے، جتنی ہمیں اس کی ضرورت ہے۔‘‘

کانگریس کے سابق قومی صدر اور رکن پارلیمنٹ راہل گاندھی نے بھی نئے سال کے موقع پر لوگوں کے لیے نیک خواہشات کا اظہار کیا ہے۔ انھوں نے رات 12 بجے کے ٹھیک بعد کیے گئے اپنے ٹوئٹ میں عوام سے مخاطب ہوتے ہوئے لکھا ہے کہ ’’آپ سبھی کو نئے سال کی مبارکباد۔ یہ سال آپ کے لیے خوشگوار گزرے۔‘‘

کانگریس جنرل سکریٹری پرینکا گاندھی نے سالِ نو کے پیش نظر عوام کو مبارکباد دیتے ہوئے جو ٹوئٹ کیا ہے اس میں لکھا ہے کہ ’’سبھی کو نئے سال کی نیک خواہشات۔ آپ سب کو نیا سال بہت بہت مبارک۔‘‘ کانگریس کے آفیشیل ٹوئٹر ہینڈل سے بھی اس موقع پر ایک ٹوئٹ کیا گیا ہے جس میں لکھا گیا ہے ’’یہ نیا سال ہمارے لیے امن و خیر سگالی کا سال ثابت ہو اور صحت بخش بھی ہو۔‘‘ ساتھ ہی اس ٹوئٹ میں لکھا گیا ہے کہ ’’اس نئے سال میں ہم اپنی آواز حکومت (کی عوام مخالف پالیسیوں) کے خلاف اٹھاتے رہیں گے۔‘‘

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-