تھانے – راشٹروادی کانگریس پارٹی-شرد چندر پوار کا سدابھاؤ کھوت پر مقدمہ درج کرنے کا مطالبہ
تھانے (آفتاب شیخ)
راشٹروادی کانگریس پارٹی-شرد چندر پوار گروپ نے اپنے قومی صدر شرد پوار کے خلاف توہین آمیز بیان دینے والے ایم ایل اے سدابھاؤ کھوت کے خلاف قانونی کارروائی کا مطالبہ کیا ہے۔ اس حوالے سے تھانے ضلع صدر سُہاس دیسائی اور خواتین صدر سجاتا گھاگ نے نؤپاڑا پولیس اسٹیشن میں تحریری درخواست دی ہے۔
رپورٹ کے مطابق، سدابھاؤ کھوت نے گزشتہ دنوں شرد پوار پر طنزیہ تنقید کرتے ہوئے قابلِ اعتراض کلمات کہے تھے، جس پر ناراضگی کا اظہار کرتے ہوئے راشٹروادی کانگریس پارٹی نے ان کے خلاف مقدمہ درج کرانے کا فیصلہ کیا ہے۔
تھانے ضلع صدر سُہاس دیسائی کا کہنا ہے کہ شرد پوار نے اپنے وزیر اعلیٰ کے عہدے پر رہتے ہوئے خواتین کی ترقی، زراعت، صنعت اور کھیلوں کے شعبے میں متعدد پالیسیاں نافذ کیں۔ ان کے مطابق، کھوت کے بیانات عوام میں غلط فہمیاں پھیلانے اور شرد پوار کی شخصیت کو نقصان پہنچانے کی کوشش ہیں، جو کہ ایک سنگین جرم ہے۔ دیسائی نے کہا کہ اس بیان سے عوام میں نفرت پیدا کر کے پوار کی جان کو خطرے میں ڈالنے کی کوشش کی جا رہی ہے۔
شکایت میں یہ بھی شامل ہے کہ سدابھاؤ کھوت نے شرد پوار کی صحت کے حوالے سے نامناسب بیانات دے کر ان کے حامیوں کے جذبات کو بھی مجروح کیا ہے۔ پارٹی رہنماؤں کا کہنا ہے کہ کھوت کے بیانات نہ صرف عوام کو گمراہ کرنے کے مترادف ہیں بلکہ ضابطہ اخلاق کی خلاف ورزی بھی ہیں، اس لیے ان کے خلاف قانونی کارروائی کی جانی چاہیے۔
اس موقع پر پارٹی کی دیگر سینئر شخصیات اور عہدیدار، جن میں رچنا ویدیہ، گجانن چودھری، راجیش ساٹم، راجیش قدم، مادھوری سونار، وکرانت گھاگ، اور دیگر کارکنان بھی موجود تھے۔
