اہم خَبر: منریگا کے کام کے دنوں میں اضافہ کا کوئی ارادہ نہیں… مرکزی وزیر :

منریگا کے تحت کام کے دنوں میں اضافہ کرنے کی کوئی تجویز نہیں: مرکزی وزیر

نئی دہلی: مہاتما گاندھی قومی روزگار گارنٹی اسکیم (منریگا) کے تحت مزدوروں کے کام کے دنوں کو بڑھانے کی فوری کوئی تجویز نہیں ہے۔ دیہی ترقی کے مرکزی وزیر نریندر سنگھ تومر نے جمعہ کو راجیہ سبھا میں ایک سوال کے جواب میں کہا کہ منریگا مطالبے پر مبنی اسکیم ہے اور اس کے تحت ایک کنبے کو سالانہ 100 دن کا روزگار دیے جانے کی تجویز ہے۔ کام کے دنوں کی تعداد میں اضافہ کی فی الحال کوئی تجویز نہیں ہے ۔ انہوں نے کہا کہ منریگا کے تحت مختلف ریاستوں میں اجرت بھی مختلف ہے۔ انہوں نے کہا کہ منریگا کے لئے رقومات کی کمی نہیں ہے ۔ حکومت منریگا کے تحت اجرت کی رقم بڑھانے کی کوشش کرے گی۔

مودی بہت اچھے میڈیا منیجر، دگوجے سنگھ

بھوپال: کانگریس کے سینئر لیڈر اور مدھیہ پردیش کے سابق وزیر اعلی دگ وجے سنگھ نے وزیر اعظم نریندر مودی پر عالمی یوم یوگا کے بہانے تنقید کرتے ہوئے آج کہا کہ وہ بہت اچھے ایونٹ منیجر کے ساتھ ساتھ میڈیا منیجر بھی ہیں۔

سنگھ نے اپنے مسلسل ایک کے بعد ایک ٹویٹ میں کہا کہ مودی یوگا کی تشہیر کر رہے ہیں۔ یہ اچھا ہے، لیکن یوگا، دھیان ، ’پران یام‘ کئی اقسام کے ہوتے ہیں اور ہر شخص کے جسم کی ساخت پر یہ منحصر ہے کہ کون سا اس کے جسم کے لئے مناسب ہو گا۔ انہوں نے کہا کہ جس طرح سے وزیر اعظم اسے میڈیا ایونٹ بنا رہے ہیں، وہ غلط ہے۔ ہر شخص کو اس کے جسم کی ساخت کی بنیاد پر کسی اچھے طبیب کی موجودگی میں ہی یوگا کرنا چاہئے ورنہ ہر یوگا مشق اس کا نقصان بھی کر سکتی ہے ۔

سابق وزیر اعلی نے بھارتیہ جنتا پارٹی کے سینئر لیڈر لال کرشن اڈوانی کا بھی حوالہ دیتے ہوئے کہا کہ انہوں نے مودی کو اچھا ایونٹ منیجر بتایا تھا ۔انہوں نے کہا کہ وہ اس میں یہ بھی شامل کرنا چاہتے ہیں کہ مودی بہت اچھے میڈیا منیجر بھی ہیں۔

الیکشن جیتنے کے لئے ایران کے خلاف جنگی مہم چلا سکتے ہیں ٹرمپ

واشنگٹن: امریکی صدر ڈونالڈ ٹرمپ ایران كے خلاف جنگ کے پروپیگنڈے کے ذریعہ ملک کو متحد کرکے 2020 کا صدارتی انتخابات جیتنے کے لئے اپنی دعویداری مضبوط کر سکتے ہیں۔ سیاسی اور بین الاقوامی امور کے تجزیہ کاروں نے اسپوتنك کو یہ اطلاع دی۔

ایران کے اسلامی ریوولیوشنری گارڈس کارپس (آئی آر جی سی) نے دعوی کیا ہے کہ اس نے جمعرات کو ایک امریکی انٹیلی جنس ڈرون طیارہ مار گرایا ہے۔ اس واقعہ کے بعد سے دونوں ممالک کے درمیان کشیدگی عروج پر پہنچ گئی ہے۔ ٹرمپ نے امریکہ کے انٹیلی جنس ڈرون طیارے کو مار گرانے کے ایران کے دعوے کے بعد ٹویٹ کیا تھاکہ ’’ایران نے بہت بڑی غلطی کر دی ہے‘‘َ۔

امریکی صدر کے اس ٹویٹ کو ایران کو انتباہ دیئے جانے کے طور پر دیکھا جا رہا ہے۔ امریکی انٹیلی جنس ڈرون کی شناخت آركيو ۔4 گلوبل ہاک کے طور پر کی گئی ہے۔ آركيو ۔4 عام طور پر زیادہ بلندی پر پرواز کرتا ہے۔

ٹرمپ نے منگل کے روز فلوریڈاکے آرلینڈو میں ایک بہت بڑی ریلی کرکے سال 2020 میں ہونے والے صدارتی انتخابات کے لئے اپنی تشہیری مہم کا آغاز کیا۔ انہوں نے تقریباً 20 ہزار لوگوں کو خطاب کرتے ہوئے کہاکہ ’’میں آج رات سے اپنی دوسری مدت کار کی انتخابی مہم کے لئے آپ کے سامنے کھڑا ہوں‘‘َ۔ ٹرمپ نے ملک کی معیشت، امیگریشن پالیسیوں اور تجارتی نقطہ نظر اور وفاقی عدالتوں کے تعمیر نو کی کوششوں سمیت کئی مسائل کا اپنی تقریر میں ذکر کیا۔

شاہین باغ سے کالندی کنج کی جانب میجنٹا لائن پر میٹرو خدمات بحال

نوئیڈا کے بوٹنیکل گارڈن اور جسولا وِہار (شاہین باغ) کے درمیان دہلی میٹرو ٹرین کی خدمات پھر سے شروع ہو گئی ہیں۔ دہلی کے کالندی کنج میٹرو اسٹیشن کے پاس شاہین باغ کے فرنیچر مارکیٹ میں آج صبح زبردست آگ لگ گئی تھی۔ آگ کی لپٹیں میٹرو کے ستونوں تک پہنچ گئی تھیں جس کے بعد ٹرین خدمات کو کچھ گھنٹوں کے لیے بند کر دیا گیا تھا۔ آگ پر قابو پانے کے بعد اب اس لائن پر میٹرو خدمات شروع کر دی گئی ہیں۔

#UPDATE Delhi Metro train services have resumed between Botanical Garden and Jasola Vihar- Shaheen Bagh; Delhi; A fire broke out in a furniture market in Shaheen Bagh near Kalindi Kunj metro station, early morning today. #Delhi pic.twitter.com/oQQAAmGRKv

— ANI (@ANI) June 21, 2019

کالندی کنج میں آگ لگنے کے سبب میجنٹا لائن پر میٹرو سروس متاثر

نئی دہلی: دہلی کی لائف لائن میٹرو میجنٹا لائن پر جسولا وہار (شاہین باغ) اور كالندی کنج کے درمیان میٹرو سروس کو جمعہ کی صبح عارضی طور پر بند کر دیا گیا۔ كالندی کنج میٹرو اسٹیشن کے نزدیک فرنیچر مارکیٹ میں آگ لگنے کی وجہ سے میٹرو سروس کو بند دیا گیا۔ دہلی میٹرو نے اپنے ٹویٹ میں لکھا ’’میجنٹا لائن پر جسولا وہار شاہین باغ اور كالندی کنج کے درمیان میٹرو سروس کو عارضی طور پر کچھ وقت کے لئے بند کر دیا گیا۔ میٹرو اسٹیشن کے نزدیک آگ لگنے کی وجہ سے ایسا کیا گیا۔ تکلیف کے لیے ہم معذرت خواہ ہیں‘‘۔ جنک پوری مغرب، جسولا وہار اور شاہین باغ کے درمیان میٹرو تھوڑے تھوڑے وقفے پر چل رہی ہے۔ كالندی کنج اور بوٹینکل گارڈن کے درمیان میٹرو سروس عارضی طور پر بند ہے۔

Magenta Line Update

Train movement has been stopped temporarily between Jasola Vihar Shaheen Bagh and Kalindi Kunj due to smoke and fire from a fire underneath the section. We regret the inconvenience.

— Delhi Metro Rail Corporation (@OfficialDMRC) June 21, 2019

ہماچل پردیش بس حادثہ میں مہلوکین کی تعداد 44 پہنچی

ہماچل پردیش میں جمعرات کو ہوئے بس حادثہ میں مرنے والوں کی تعداد بڑھ کر 44 ہو گئی ہے جبکہ اس واقعہ میں زخمی تقریباً 34 افراد کا علاج مختلف اسپتالوں میں ہو رہا ہے۔ حادثہ ہماچل پردیش واقع کلو کے بنجار علاقہ میں سرزد ہوا تھا۔ دراصل مسافروں سے بھری ایک بس 500 فیٹ گہری کھائی میں گر گئی تھی جس کے بعد مقامی لوگوں اور پھر سرکاری عملہ نے فوری طور پر راحت کاری کا کام شروع کیا اور زخمیوں کو قریبی اسپتال میں داخل کرایا۔ کانگریس صدر راہل گاندھی نے اس اندوہناک بس حادثہ پر اظہار غم کیا ہے۔