اندور:(ورق تازہ نیوز)مدھیہ پردیش، مہاراشٹر اور تلنگانہ کو آپس میں جوڑنے والا 743 کلومیٹر طویل اندور۔حیدرآباد ایکسپریس وے ملک کے اہم گرین فیلڈ شاہراہی منصوبوں میں شمار کیا جا رہا ہے۔ اس ایکسپریس وے کی تکمیل کے بعد اندور سے حیدرآباد تک کا سفر پہلے کے مقابلے میں کہیں زیادہ تیز، محفوظ اور آسان ہو جائے گا۔
رپورٹس کے مطابق اس منصوبے کے مکمل ہونے پر اندور سے حیدرآباد تک کا سفری وقت تقریباً 16 گھنٹوں سے کم ہو کر صرف 7 گھنٹے رہ جائے گا، جبکہ دونوں شہروں کے درمیان سڑک کا فاصلہ بھی تقریباً 170 کلومیٹر تک کم ہو جائے گا۔یہ ایکسپریس وے مدھیہ پردیش کے اندور، کھنڈوا، خرگون اور برہان پور، مہاراشٹر کے اکولہ، واشم، ہنگولی، کلم نوری، ناندیڑ، دیگلور ، جبکہ تلنگانہ کے بودھن، سنگاریڈی اور حیدرآباد سمیت تقریباً 15 اہم شہروں اور قصبوں کو براہِ راست جوڑے گا۔
منصوبے سے تینوں ریاستوں کے درمیان تجارتی سرگرمیوں، صنعت، زراعت، مال برداری اور سیاحت کو بڑا فروغ ملنے کی توقع ہے۔ بہتر سڑک رابطے کی بدولت کاروباری لاگت میں کمی آئے گی اور سفر بھی پہلے کے مقابلے میں زیادہ تیز اور محفوظ ہوگا۔اس وقت منصوبے کے متعدد حصوں پر تعمیراتی کام تیزی سے جاری ہے۔
خاص طور پر اندور–خرگون کے دشوار گزار گھاٹ سیکشن میں سرنگوں اور فور لین شاہراہ کی تعمیر کی جا رہی ہے، جس سے گاڑیوں کی آمد و رفت مزید آسان ہو جائے گی۔ناندیڑ اور مراٹھواڑہ کے عوام کے لیے بھی یہ منصوبہ انتہائی اہم ثابت ہوگا، کیونکہ ایکسپریس وے کی تکمیل کے بعد ناندیڑ سے اندور، حیدرآباد اور وسطی بھارت کے دیگر اہم شہروں تک تیز رفتار سڑک رابطہ قائم ہوگا، جس سے سرمایہ کاری، صنعت، لاجسٹکس اور سیاحت کے شعبوں میں نمایاں ترقی کی امید کی جا رہی ہے۔