ممبئ (ورق تازہ نیوز)ریاست بھر میں گیس سلنڈر کی قیمتوں میں اضافہ کر دیا گیا ہے اور نئی قیمتیں آج سے نافذ ہو گئی ہیں۔ گھریلو گیس سلنڈر کی قیمت میں 60 روپے کا اضافہ کیا گیا ہے، جبکہ 19 کلوگرام کے تجارتی گیس سلنڈر کی قیمت میں 115 روپے کا اضافہ ہوا ہے۔
بتایا جا رہا ہے کہ اس قیمت میں اضافے کی وجہ بین الاقوامی حالات ہیں۔ امریکہ، ایران اور اسرائیل کے درمیان جاری کشیدہ صورتحال کے باعث گیس کی سپلائی متاثر ہوئی ہے، جس سے گیس کی قلت پیدا ہو گئی ہے۔ طلب میں اضافے کی وجہ سے گیس سلنڈر کی قیمتوں میں اضافہ کیا گیا ہے۔
اس قیمت میں اضافے کے باعث ریاست کے عام شہریوں اور کاروباری طبقے پر مالی بوجھ بڑھنے کا امکان ہے۔ دریں اثنا بڑھتی ہوئی گیس قیمتوں کا سب سے زیادہ اثر عام صارفین پر پڑ رہا ہے اور اس کا بوجھ براہ راست عوام کو برداشت کرنا پڑ رہا ہے۔