مہاراشٹر پر بڑا خطرہ، آئندہ 72 گھنٹے نہایت اہم، موسلا دھار بارش کی پیش گوئی، متعدد اضلاع کے لیے ہائی الرٹ

ممبئی: (ورق تازہ نیوز)ریاست مہاراشٹر میں مانسون ایک بار پھر پوری شدت کے ساتھ سرگرم ہو گیا ہے۔ معروف موسمیات کے ماہر پنجاب راؤ ڈکھ نے پیش گوئی کی ہے کہ آئندہ 72 گھنٹے ریاست کے لیے نہایت حساس اور خطرناک ثابت ہو سکتے ہیں۔ ان کے مطابق کئی علاقوں میں موسلا دھار سے انتہائی موسلا دھار بارش، تیز ہوائیں اور گرج چمک کے ساتھ بارش ہونے کا امکان ہے۔

پنجاب راؤ ڈکھ کے مطابق کونکن، مغربی مہاراشٹر، مراٹھواڑہ، شمالی مہاراشٹر اور ودربھ کے مختلف اضلاع میں بارش کی شدت برقرار رہ سکتی ہے۔ نشیبی علاقوں، دریا کے کناروں اور پہاڑی علاقوں میں رہنے والے شہریوں کو خاص احتیاط برتنے کی ہدایت دی گئی ہے۔

ان اضلاع میں زیادہ بارش کا امکان

ممبئی، تھانے، پالگھر، رائے گڑھ

رتناگیری، سندھودرگ

پونے، ستارا، کولہاپور

ناسک، احمد نگر

چھترپتی سمبھاجی نگر، جالنہ، بیڑ، ناندیڑ، پربھنی، ہنگولی،ناگپور، امراوتی، یوت مال، وردھا، بھنڈارا، گونڈیا، گڑچرولی اور چندرپور سمیت کئی اضلاع میں شدید بارش متوقع ہے۔

انتظامیہ کی شہریوں سے اپیل

شہری غیر ضروری طور پر سیلاب زدہ علاقوں یا ندی نالوں کے قریب جانے سے گریز کریں۔ گرج چمک کے دوران کھلے میدان یا درختوں کے نیچے کھڑے نہ ہوں۔ کسان موسمی پیش گوئی کو مدنظر رکھتے ہوئے زرعی سرگرمیوں کی منصوبہ بندی کریں اور مقامی انتظامیہ و محکمہ موسمیات کی ہدایات پر عمل کریں۔

واضح رہے کہ پنجاب راؤ ڈکھ کی پیش گوئی عوام میں مقبول ہے، تاہم شہریوں کو چاہیے کہ وہ سرکاری محکمہ موسمیات کی تازہ ترین وارننگز اور الرٹس پر بھی مسلسل نظر رکھیں۔