ممبئی، 20 مئی:(ورق تازہ نیوز)شرد پوار کی موجودگی میں ممبئی کے وائی بی چوہان سینٹر میں بدھ کے روز نیشنلسٹ کانگریس پارٹی (شرد چندر پوار) کے اہم لیڈروں اور ارکانِ اسمبلی کی ایک اہم میٹنگ منعقد ہوئی، جس میں پارٹی کی آئندہ حکمت عملی اور ریاستی سیاست میں سرگرمی بڑھانے پر غور کیا گیا۔
اس اجلاس میں صرف انتخابی تیاریوں پر ہی نہیں بلکہ تنظیمی ڈھانچے کو مضبوط بنانے اور ’تُتاری‘ انتخابی نشان کے ذریعے عوامی سطح پر اپنی گرفت مزید مستحکم کرنے پر بھی زور دیا گیا۔ پارٹی قیادت نے کارکنوں میں نیا جوش پیدا کرنے کی کوشش کی۔
تاہم اس میٹنگ میں سب سے زیادہ چرچا ممکنہ سیاسی انضمام اور اجیت پوار کے گروپ کے اندر مبینہ بغاوت کی خبروں پر رہا، جس نے سیاسی ماحول کو مزید گرم کر دیا ہے۔ ذرائع کے مطابق اجیت پوار گروپ کے تقریباً 22 ایم ایل اے شرد پوار کے رابطے میں ہونے کی قیاس آرائیاں بھی زور پکڑ رہی ہیں۔
میٹنگ کے دوران بعض ارکانِ اسمبلی نے قیادت سے براہِ راست سوال کرتے ہوئے کہا کہ پارٹی کے کسی دوسرے سیاسی جماعت میں انضمام سے متعلق پھیلنے والی افواہیں زمینی سطح پر کام کرنے والے کارکنوں میں شدید الجھن پیدا کر رہی ہیں، جس سے تنظیم کو نقصان پہنچ سکتا ہے۔
اس موقع پر سپریا سولے نے واضح کیا کہ فی الحال کسی بھی قسم کے انضمام پر کوئی بات چیت نہیں ہو رہی ہے۔ انہوں نے کہا کہ پارٹی اپنی خودمختار حیثیت برقرار رکھتے ہوئے تنظیم کو مزید مضبوط بنانے پر توجہ دے رہی ہے۔
سیاسی مبصرین کے مطابق مہاراشٹر کی سیاست میں جاری یہ سرگرمیاں آنے والے دنوں میں بڑے سیاسی اتار چڑھاؤ کا اشارہ دے رہی ہیں۔