نئی دہلی: نیشنلسٹ کانگریس پارٹی نے جموں و کشمیر اسمبلی انتخابات 2024 کے دوسرے مرحلے کے لیے اپنے 16 امیدواروں کی فہرست پارٹی کے قومی جنرل سیکرٹری اور جموں و کشمیر کے انچارج برج موہن سریواستو نے آج جاری کی ہے۔
سریواستو نے بتایا کہ پارٹی کے پارلیمانی بورڈ نے وادی کے 3 اہم اضلاع میں انتخابات لڑنے کے لیے 16 امیدواروں کے ناموں کی منظوری دے دی ہے۔ یہ تمام امیدوار نیشنلسٹ کانگریس پارٹی کے منظور شدہ امیدوار کے طور پر گھڑی کے انتخابی نشان پر میدان میں اتریں گے۔ قابل ذکر بات یہ ہے کہ نیشنلسٹ کانگریس پارٹی پہلی بار جموں و کشمیر کے انتخابات میں حصہ لے رہی ہے اور یہ انتخابات بغیر کسی اتحاد کے لڑ رہی ہے۔
قابل ذکر ہے کہ جموں و کشمیر اسمبلی کی 90 نشستوں پر تین مراحل میں انتخابات ہونے ہیں۔ اس کے تحت دوسرے مرحلے میں 26 اسمبلی حلقوں میں 25 ستمبر کو ووٹنگ ہوگی۔ پارٹی کے قومی صدر اجیت پوار اور کارگزار صدر پرفل پٹیل سمیت نیشنلسٹ کانگریس پارٹی کے قومی عہدیداروں نے جموں و کشمیر کے ووٹروں سے درخواست کی ہے کہ ان کے پاس ایک موقع ہے جس کے ذریعے وہ جموں و کشمیر کی ترقی کے لیے اور اپنے بچوں اور مستقبل کو روشن بنا سکتے ہیں۔ این سی پی کے لیڈروں نے یہ بھی اپیل کی ہے کہ کشمیر کے ووٹرز بڑھ چڑھ کر ووٹنگ میں حصہ لیں تاکہ جموں و کشمیر میں ایک مضبوط حکومت بن سکے۔