ممبئی میں شرد پوار کی قیادت میں این سی پی-ایس پی کا اعلیٰ سطحی اجلاس
بلدیاتی، گریجویٹ و ٹیچرس حلقوں کے انتخابات کے لیے نئی حکمتِ عملی، تنظیمی اتحاد اور عوامی رابطے پر زور
ممبئی: نیشنلسٹ کانگریس پارٹی (شرد چندر پوار) نے آئندہ بلدیاتی اداروں، گریجویٹ اور اساتذہ کے انتخابی حلقوں کے پیشِ نظر اپنی تنظیمی صف بندی کو مستحکم کرنے کے لیے آج ممبئی میں ایک اعلیٰ سطحی اجلاس منعقد کیا۔ اس اجلاس کی صدارت پارٹی کے قومی صدر اور سینئر لیڈر شرد پوار نے کی، جنہوں نے نہ صرف انتخابی حکمتِ عملی پر گفتگو کی بلکہ کارکنوں کو زمینی سطح پر عوامی رابطے بڑھانے کی ہدایت بھی دی۔
اجلاس میں شرکت کے لیے ریاست کے مختلف اضلاع سے اراکینِ پارلیمنٹ، اراکینِ اسمبلی اور پارٹی کے فرنٹل ونگز کے ذمہ داران بڑی تعداد میں ممبئی پہنچے۔ یہ اجلاس پارٹی کے ریاستی دفتر میں منعقد ہوا، جس میں بلدیاتی اداروں کے انتخابات کے علاوہ تنظیمی کمزوریوں، نئے عہدیداران کی نامزدگی اور انتخابی تیاریوں کا تفصیلی جائزہ لیا گیا۔ شرد پوار نے واضح کہا کہ یہ وقت تنظیم کو میدان میں اتارنے کا ہے، عوام سے رشتہ مضبوط کرنا ہی ہماری اصل طاقت ہے۔اس اجلاس میں چھترپتی سنبھاجی نگر اور پونے کے گریجویٹ و اساتذہ حلقوں کے پس منظر میں سیاسی حالات کا تفصیلی تجزیہ پیش کیا گیا۔ شرد پوار نے پارٹی کے مختلف ونگز، خصوصاً اساتذہ و گریجویٹ سیل کے نمائندوں سے تجاویز لیں اور کہا کہ تعلیمی طبقہ ہمیشہ شعور اور خدمت کا مرکز رہا ہے، اگر ہم ان کے حقیقی مسائل کو ایوان میں اٹھائیں تو عوامی اعتماد خود بخود حاصل ہوگا۔
اجلاس کے دوران تنظیمی رپورٹوں کے علاوہ انتخابی حلقوں میں عوامی تائید کے اعداد و شمار بھی پیش کیے گئے۔ مختلف اضلاع کے نمائندوں نے شرد پوار کے سامنے اپنے علاقوں کی سیاسی صورتحال رکھی اور کہا کہ عوام اب بھی این سی پی کو ایک متبادل اور تجربہ کار قیادت کے طور پر دیکھتے ہیں۔ شرد پوار نے کہا کہ ہمارا مقصد صرف انتخابات جیتنا نہیں بلکہ عوام کے مسائل کو ان کی زبان میں سمجھنا اور حل کے لیے کھڑا ہونا ہے۔ انہوں نے کارکنوں کو ہدایت دی کہ وہ انتخابی مہم کے دوران عوام کے روزمرہ مسائل جیسے تعلیم، زراعت، روزگار، صحت اور شہری ترقی پر توجہ دیں۔ پوار نے کہا کہ ہماری جدوجہد عوامی فلاح کے لیے ہے، ہمیں حکومت کی ناکامیوں کو اجاگر کرنے کے ساتھ ساتھ اپنی پالیسیوں کو بھی واضح طور پر پیش کرنا ہوگا۔
شرد پوار نے میٹنگ کے دوران اس بات پر زور دیا کہ پارٹی کے اندرونی اتحاد کو ہر قیمت پر برقرار رکھا جائے۔ انہوں نے کہا کہ اختلاف رائے جمہوریت کی نشانی ہے، لیکن ہمارا مقصد ایک ہے، مہاراشٹر کے عوام کا اعتماد جیتنا۔ شرد پوار نے واضح کیا کہ یہ لڑائی اصولوں کی ہے، اقتدار کی نہیں۔ ہمیں اپنی عوامی جدوجہد سے ہی اپنی پہچان قائم رکھنی ہے۔ اجلاس کے دوران موجود لیڈروں نے بھی اس عزم کا اظہار کیا کہ آنے والے انتخابات میں پارٹی متحد ہوکر میدان میں اترے گی اور مہاراشٹر میں ایک نئی سیاسی فضا قائم کرے گی۔
میٹنگ کے اختتام پر سپریا سُلے نے کہا کہ آنے والے دنوں میں پارٹی کی خواتین، نوجوان اور کسان شاخوں کو بھی میدان میں سرگرم کیا جائے گا تاکہ پارٹی کی مہم ہر طبقے تک پہنچ سکے۔ انہوں نے کہا کہ نیشنلسٹ کانگریس پارٹی شرد پوار گروپ اپنی پالیسیوں، شفاف طرزِ سیاست اور تجربہ کار قیادت کی بنیاد پر ریاستی سطح پر ایک مضبوط متبادل کے طور پر ابھر رہی ہے۔ پارٹی ذرائع کے مطابق آنے والے ہفتوں میں ریاست کے تمام اضلاع میں تنظیمی میٹنگوں کا سلسلہ شروع کیا جائے گا۔ ان میٹنگوں میں ہر ضلع کی سطح پر انتخابی کمیٹیاں تشکیل دی جائیں گی اور زمینی سطح پر ووٹر رابطہ مہم کو مزید تیز کیا جائے گا۔
اس میٹنگ میں پارٹی کی قومی کارگزار صدر سپریا سُلے، ریاستی صدر ششی کانت شندے، اسمبلی میں پارٹی کے لیڈر جینت پاٹل، سابق وزراء راجیش ٹوپے، بالا صاحب پاٹل، جے پرکاش داندےگاؤںکر، پارٹی کے جنرل سکریٹری اور سیل انچارج روہت پوار، رکنِ پارلیمنٹ ڈاکٹر امول کولہے، بھاسکر بھاگرے، نیلش لنکے، دھیریشیل موہِتے پاٹل، بجرنگ سوناوَنے، رکنِ اسمبلی سندیپ کھیرا ساگر، باپو صاحب پتھارے، اتّم راؤ جانکر اور سنیل بھوسار سمیت پارٹی کے تمام فرنٹل سیلز کے ریاستی صدور و عہدیداران بڑی تعداد میں موجود تھے۔
NCP-SP Urdu News 13 Oct. 25.docx