چیف جسٹس بھوشن گوئی کے دورۂ مہاراشٹر کے دوران پروٹوکول کی خلاف ورزی پر کارروائی کی جائے: نانا پٹولے
ممبئی، 20 مئی 2025
کانگریس کے سینئر رہنما نانا پٹولے نے صدر جمہوریہ دروپدی مرمو کو خط لکھ کر مطالبہ کیا ہے کہ مہاراشٹر دورے کے دوران چیف جسٹس آف انڈیا محترم بھوشن گوئی کے ساتھ پروٹوکول کی جو خلاف ورزی کی گئی، اس میں ملوث سرکاری افسران پر سخت کارروائی کی جائے۔
اس سلسلے میں گفتگو کرتے ہوئے نانا پٹولے نے کہا کہ چیف جسٹس ایک اعلیٰ آئینی منصب پر فائز ہیں، ان کی توہین محض ایک فرد کی نہیں، بلکہ مکمل عدلیہ کی توہین ہے۔ یہ محض ایک افسر کی غفلت یا بدسلوکی کا معاملہ نہیں بلکہ بھارتی آئین کی عظمت اور اس کے وقار پر براہِ راست حملہ ہے، جسے انتہائی سنجیدگی سے لینا چاہیے۔
انہوں نے کہا کہ جسٹس بھوشن گوئی نہ صرف ملک کی اعلیٰ ترین عدالتی شخصیت ہیں بلکہ وہ امبیڈکر وادی فکر سے وابستہ ہیں اور ریاست مہاراشٹر کے فرزند بھی ہیں۔ اس کے باوجود انہیں مہاراشٹر حکومت اور انتظامیہ کی جانب سے جو سردمہری اور توہین آمیز رویہ ملا، وہ نہ صرف آئینی آداب کے خلاف ہے بلکہ سماجی لحاظ سے بھی بے حد حساس نوعیت کا مسئلہ ہے۔
چیف جسٹس گوئی نے خود اپنے خطاب میں مہاراشٹر حکومت اور انتظامیہ کی کارکردگی پر سخت الفاظ میں عدم اطمینان کا اظہار کیا، جس کے بعد یہ معاملہ نہ صرف ریاستی بلکہ قومی سطح پر بھی توجہ کا مرکز بن گیا ہے۔ نانا پٹولے نے کہا کہ یہ محض پروٹوکول کی خلاف ورزی نہیں، بلکہ ایک خاص نظریہ اور آئینی اقدار کی بے توقیری ہے — اور یہی ایک سنجیدہ سوال کھڑا کرتا ہے۔
اسی تناظر میں نانا پٹولے نے صدر جمہوریہ کو خط ارسال کر کے مطالبہ کیا ہے کہ اس معاملے میں ملوث افسران کے خلاف فوری کارروائی کی جائے، تاکہ آئندہ اس نوعیت کے واقعات نہ ہوں اور آئینی اداروں کا وقار برقرار رکھا جا سکے۔