گرمیوں کی تعطیلات کے دوران مسافروں کی سہولت
ایس ٹی کارپوریشن روزانہ 764 اضافی طویل مسافتی بسیں چلائے گی
ممبئی (آفتاب شیخ)
مہاراشٹر اسٹیٹ روڈ ٹرانسپورٹ کارپوریشن (ایم ایس آر ٹی سی) نے گرمیوں کی تعطیلات کے دوران مسافروں کی بڑھتی ہوئی تعداد کو مدنظر رکھتے ہوئے اضافی بسیں فراہم کرنے کا اعلان کیا ہے۔ اس سال 15 اپریل سے 15 جون 2025 تک روزانہ 764 اضافی طویل مسافتی بسیں مختلف روٹس پر چلائی جائیں گی، جن کی پیشگی بکنگ کا آغاز ہو چکا ہے۔
ایس ٹی کارپوریشن ہر سال گرمیوں کی تعطیلات کے دوران بسوں کی تعداد میں اضافہ کرتی ہے تاکہ دیہی علاقوں میں سفر کرنے والے افراد کو سہولت فراہم کی جا سکے۔ اس دوران اسکول بس سروسز معطل کرکے زیادہ طلب والے روٹس پر اضافی طویل مسافتی بسیں چلائی جاتی ہیں۔
ایم ایس آر ٹی سی کے مطابق، اس منصوبے کے تحت ریاست بھر میں 521 روٹس پر اضافی بسیں چلائی جائیں گی، جو روزانہ مجموعی طور پر 2.50 لاکھ کلومیٹر کا فاصلہ طے کریں گی۔ تمام بسوں کی بکنگ آن لائن اور آف لائن دونوں ذرائع سے کی جا سکتی ہے۔
مسافروں کی سہولت کے لیے، ایم ایس آر ٹی سی کی آفیشل ویب سائٹ www.msrtc.maharashtra.gov.in، npublic.msrtcors.com، موبائل ایپ اور تمام بس اسٹیشنز پر ریزرویشن مراکز سے پیشگی بکنگ کی سہولت فراہم کی گئی ہے۔
ایس ٹی کارپوریشن نے عوام سے اپیل کی ہے کہ وہ اپنے سفری منصوبے پہلے سے ترتیب دیں اور اس سہولت سے بھرپور فائدہ اٹھائیں۔