گائیمکھ گھاٹ کی خستہ حال سڑک کی مرمت تیز کنکریٹ سے کی جائے گی: میونسپل کمشنر سوربھ راؤ
تھانے، 15 جولائی (آفتاب شیخ):
چینا گاؤں کے کاجو پاڑہ سے گائیمکھ گھاٹ تک جانے والی سڑک کی حالت انتہائی خراب ہو چکی ہے، جس کے باعث عام شہریوں کو شدید مشکلات کا سامنا کرنا پڑ رہا ہے۔ سڑک بار بار مرمت کے باوجود بارش اور بھاری ٹریفک کی وجہ سے ٹوٹ پھوٹ جاتی ہے۔ اسی مسئلہ کے پیشِ نظر تھانے میونسپل کمشنر سوربھ راؤ نے ہدایت دی ہے کہ اس گھاٹ روڈ کی مرمت ریپڈ ہارڈننگ کنکریٹ یعنی تیزی سے سخت ہونے والی کنکریٹ سے کی جائے، تاکہ بارش کے دوران بھی سڑک کی مرمت ممکن ہو اور ٹریفک متاثر نہ ہو۔
فاؤنٹین ہوٹل سے لے کر گائیمکھ گھاٹ تک تھانے کی طرف جانے والی سڑک کی حالت نہایت ابتر ہے۔ اگرچہ سنگ ریزہ اور تارکول کی مدد سے مرمت کی گئی تھی، لیکن سڑک بار بار خراب ہورہی ہے، جس کی وجہ سے اس حصے میں گاڑیوں کی آمد و رفت سست ہو جاتی ہے۔ بعض اوقات مخالف سمت سے آنے والی گاڑیاں بھی رکاوٹ بن جاتی ہیں، جس کے نتیجے میں مصروف اوقات میں ممبئی-احمد آباد روڈ پر بھی ٹریفک جام محسوس کیا جاتا ہے۔
منگل کو تھانے میونسپل کمشنر سوربھ راؤ کی صدارت میں منعقدہ اجلاس میں ٹریفک پولیس کے ڈپٹی کمشنر پنکج شرساٹ نے کہا کہ ٹریفک کی سست روی کا اثر میراروڈ تک پہنچ رہا ہے۔ اس پر انجینئر پراشانت سوناگرا نے رائے دی کہ چونکہ بارش کا موسم ہے، اس لیے گڑھوں کو بھرنے کے لیے "ریپڈ ہارڈننگ کنکریٹ" استعمال کی جائے، جو کم وقت میں سخت ہو جاتی ہے اور سڑک بند کیے بغیر مرمت کا کام ممکن بناتی ہے۔
سوربھ راؤ نے میونسپل کارپوریشن کو ہدایت دی کہ اس کنکریٹ کا فوری استعمال کیا جائے، اور اگر یہ تجربہ کامیاب رہا تو گھاٹ کے پورے علاقے میں اسی طرز پر مرمت کی جائے گی۔ انہوں نے واضح کیا کہ دستیاب تمام وسائل کا استعمال کرتے ہوئے اور مقامی پولیس کے تعاون سے چار گھنٹوں کے اندر ایک لین کی مرمت مکمل کی جائے۔
یہ اجلاس میونسپل کمشنر سوربھ راؤ کے دفتر میں منعقد ہوا، جس میں شہر کے چیف انجینئر پراشانت سوناگرا، ٹریفک پولیس ڈپٹی کمشنر پنکج شرساٹ، پی ڈبلیو ڈی کے سپرنٹنڈنگ انجینئر سدھارتھ تامبے، ڈپٹی کمشنر دینیش تائڈے، سب اربن انجینئر وکاس ڈھولے، گھوڑبندر روڈ کے کوآرڈینیشن ایگزیکٹو انجینئر سنجے کدم، میرا-بھائندر میونسپل کارپوریشن، ایم ایم آر ڈی اے اور جنگلات محکمہ کے نمائندے بھی موجود تھے۔
اسی اجلاس میں گھوڑبندر روڈ پر سروس روڈ اور مرکزی سڑک کو جوڑنے کا کام بھی زیر بحث آیا، جو فی الحال مانسون کی وجہ سے روک دیا گیا ہے۔ اگرچہ کچھ مقامات پر کام مکمل کیا جا چکا ہے، لیکن بعض جگہوں پر پرانی سڑک اور نئی سڑک کے درمیان خلا موجود ہے۔ اس پر کمشنر راؤ نے ایم ایم آر ڈی اے کو حکم دیا کہ وہ گھوڑبندر روڈ کا مکمل معائنہ کرے، سڑک کو برابر کرے اور جہاں ضرورت ہو مرمت کا کام فوری مکمل کرے۔ ساتھ ہی کاسروڈولی سگنل، اوولا سگنل اور کاپرباوڑی فلائی اوور پر سڑک کی مرمت کا کام جلد از جلد مکمل کرنے کے بھی احکامات جاری کیے گئے۔