ورلڈ چیمپئن شپ آف لیجنڈز 2025 کا آغاز ہو چکا ہے۔ اس ٹورنامنٹ کا پہلا مقابلہ میزبان ٹیم انگلینڈ چیمپئن اور پاکستان چیمپئن کے درمیان برمنگھم کے ایجبیسٹن کرکٹ گراؤنڈ میں کھیلا گیا، جہاں پاکستان چیمپئن نے سنسنی خیز مقابلے میں 5 رنز سے کامیابی حاصل کی۔
اس میچ کے ہیرو پاکستان چیمپئن کے کپتان محمد حفیظ رہے، جنہوں نے چوتھے نمبر پر بیٹنگ کرتے ہوئے صرف 34 گیندوں پر 158.82 کے اسٹرائیک ریٹ سے دھواں دار 54 رنز بنائے۔ اس دوران اُن کے بلے سے 8 شاندار چوکے بھی نکلے۔ انگلینڈ کے خلاف ان کی میچ جتانے والی شاندار اننگز پر انہیں پلیئر آف دی میچ قرار دیا گیا۔
پاکستان چیمپئن نے 160/9 رنز بنائے
ٹاس ہارنے کے بعد پہلے بیٹنگ کرتے ہوئے پاکستان چیمپئن نے مقررہ 20 اوورز میں 9 وکٹوں کے نقصان پر 160 رنز بنائے۔ کپتان محمد حفیظ 54 رنز کے ساتھ ٹاپ اسکورر رہے۔ ان کے علاوہ عامر یامین نے آٹھویں نمبر پر کھیلتے ہوئے صرف 13 گیندوں پر 207.69 کے اسٹرائیک ریٹ سے ناقابلِ شکست 27 رنز بنائے۔اس کے علاوہ سہیل تنویر نے 11 گیندوں پر 17 رنز اور آصف علی نے 13 گیندوں پر 15 رنز کی اننگز کھیلی۔
کرس ٹریملٹ اور لیام پلنکٹ نے حاصل کی دو، دو وکٹیں:انگلینڈ چیمپئن کی جانب سے سب سے کامیاب باؤلرز کرس ٹریملٹ اور لیام پلنکٹ رہے، جنہوں نے دو، دو وکٹیں حاصل کیں۔ ان کے علاوہ رائن سائیڈباٹم، اسٹورٹ میکر، دیمیتری ماسکریناس اور جیمز وِنس نے ایک، ایک کھلاڑی کو آؤٹ کیا۔