ناندیڑ :9/ذ(ورق تازہ نیوز):شہر ناندیڑ میں دو گروہوں کے درمیان ہونے والے خوفناک تصادم میں تین افراد کی ہلاکت کا افسوسناک واقعہ پیش آیا ہے، جس سے پورے شہر میں خوف و ہراس اور کشیدگی کی فضا پیدا ہوگئی ہے۔ اس خونی واقعے نے شہریوں میں شدید بے چینی پیدا کر دی ہے۔
موصولہ اطلاعات کے مطابق، پرانے تنازعے کے باعث دو گروہ آمنے سامنے آگئے اور دیکھتے ہی دیکھتے جھگڑا پرتشدد شکل اختیار کر گیا۔ اس دوران تین افراد موقع پر ہی ہلاک ہوگئے۔
واقعے کے بعد مرکزی ملزم شاہ رخ جائے وقوعہ سے فرار ہوگیا ہے، جبکہ پولیس اس کی گرفتاری کے لیے جنگی بنیادوں پر تلاش میں مصروف ہے۔
اس معاملے نے اس وقت مزید سنسنی خیز رخ اختیار کر لیا جب مفرور ملزم شاہ رخ نے اپنے سوشل میڈیا اکاؤنٹ پر ’اسٹوری‘ پوسٹ کرتے ہوئے براہ راست ناندیڑ پولیس کو کھلا چیلنج دیا۔ سنگین جرم کے باوجود ملزم کی سوشل میڈیا پر سرگرمی نے پولیس کے سائبر تفتیشی نظام پر سوالات کھڑے کر دیے ہیں۔
ناندیڑ پولیس نے اس معاملے کی گہرائی سے تفتیش شروع کر دی ہے اور ملزم کی گرفتاری کے لیے خصوصی ٹیمیں تشکیل دی گئی ہیں۔ مختلف مقامات پر سرچ آپریشن جاری ہے اور پولیس نے یقین ظاہر کیا ہے کہ جلد ہی ملزم کو گرفتار کر لیا جائے گا۔
دریں اثنا، اس واقعے میں جاں بحق ہونے والوں کے اہل خانہ غم سے نڈھال ہیں، جبکہ مقامی شہریوں کی جانب سے ملزم کی فوری گرفتاری اور سخت کارروائی کا مطالبہ زور پکڑ رہا ہے۔
قانون کو کھلا چیلنج دینے والا یہ واقعہ نہایت سنگین اور معاشرے کے لیے خطرے کی گھنٹی ہپولیس کو چاہیے کہ وہ اپنی تکنیکی تحقیقات کو مزید مضبوط بنائے اور جلد از جلد ملزم کو گرفتار کرے تاکہ معاشرے میں قانون کی بالادستی برقرار رہ سکے۔