"میرا آئین، میری عزت نفس" مہم کا پرجوش آغاز
آئین ہند کو اپنائے 75 سال مکمل ہونے پر بیداری مہم کا انعقاد
تھانے، 25 جون (آفتاب شیخ):
ہندوستان کے آئین کو اپنائے جانے کے 75 سال مکمل ہونے کے تاریخی موقع پر ریاست بھر میں ’اے جی این آئی‘ (Active Governance National Initiative – AGNI) کی جانب سے "میرا آئین، میری عزت نفس" کے عنوان سے ایک بیداری مہم کا آغاز کیا گیا۔ اس مہم کا مقصد نوجوانوں اور عام شہریوں میں آئین کی اقدار، فخر، اور فعال شہریت کا شعور بیدار کرنا ہے۔
اس سلسلے کی افتتاحی تقریب ٹاؤن ہال، ڈاکٹر بابا صاحب امبیڈکر مجسمہ، کورٹ ناکہ، تھانے میں بڑے جوش و خروش سے منعقد ہوئی۔ پروگرام کی شروعات AGNI کے ڈائریکٹر نکھیل پوہیکر کے تعارفی کلمات سے ہوئی جنہوں نے مہم کے مقاصد بیان کرتے ہوئے آئین کے مطالعے کی اہمیت پر زور دیا۔
انہوں نے بتایا کہ agniindia.in ویب سائٹ پر مہاراشٹر کے وزیر اعلیٰ دیویندر فڑنویس کی جانب سے آئین ہند کی سادہ اور مؤثر تشریح پر مبنی ایک تقریر پیش کی گئی ہے، جسے سن کر صارفین کو ایک کوئز حل کرنا ہوگا۔ اس مقابلے کے فاتحین کو نقد انعامات اور یادگار اسناد سے نوازا جائے گا۔
تقریب میں متعدد معزز شخصیات شریک ہوئیں جن میں روزنامہ مہاراشٹر کے ایڈیٹر سمراٹ شری گنیش بھوئٹے، روزنامہ سمراٹ شری کے ایگزیکٹو ایڈیٹر کنال کامبلے، دیگر میڈیا نمائندے، اساتذہ، طلبہ اور عام شہری شامل تھے۔
پروگرام کی سب سے خاص بات مشہور اداکارہ مدھورا ویلنکر ستم کی شرکت تھی۔ انہوں نے اپنے پُرجوش خطاب میں کہا، ’’ہمیں آئین کو صرف کتابوں تک محدود نہیں رکھنا، بلکہ اسے پڑھ کر سمجھنا اور اپنی روزمرہ زندگی میں نافذ کرنا ضروری ہے تاکہ ہم باشعور، باوقار اور ذمہ دار شہری بن سکیں۔‘‘
یہ مہم ریاست بھر میں جاری رہے گی اور عوام سے اپیل کی گئی ہے کہ وہ www.agniindia.in پر جا کر نہ صرف آئین سے متعلق ویڈیو سنیں بلکہ کوئز میں شرکت کرکے اپنی معلومات بھی آزمائیں۔
