مہاراشٹر پردیش یوتھ کانگریس کی نئی ریاستی ورکنگ کمیٹی کا اعلان
تنظیمی جنرل سکریٹری کے طور پر پروین کمار برادار کی تقرری
ممبئی: آل انڈیا یوتھ کانگریس کے قومی صدر ادے بھانو چِب کی منظوری سے مہاراشٹر پردیش یوتھ کانگریس کے ریاستی صدر شیوراج مورے نے آج نئی ریاستی ورکنگ کمیٹی کا اعلان کیا ہے۔ اس نئی کمیٹی میں مجموعی طور پر 126 ارکان شامل کیے گئے ہیں، جس کے تحت مختلف اہم عہدوں پر تقرریاں عمل میں لائی گئی ہیں۔
جاری کردہ تفصیلات کے مطابق خزانچی کے عہدے پر انیکیت نوَلے اور اکشے جین کو مقرر کیا گیا ہے، جبکہ تنظیمی جنرل سکریٹری کے طور پر پروین کمار برادار کی تقرری عمل میں آئی ہے۔ اسی طرح انتظامی جنرل سکریٹری کے عہدے پر وویک گاونڈے کو ذمہ داری سونپی گئی ہے۔
اس کے علاوہ تنویر ودروہی، پرشانت اوگلے، پرتھمیش ابناوے، کپل ڈھوکے، انوراگ بھویر، عامر عبدالسلام، دپتیش پرب اور آفرین حسین کو نائب صدور کے طور پر نامزد کیا گیا ہے۔ مزید برآں 44 جنرل سکریٹریز اور 74 ریاستی سکریٹریز کی بھی تقرری کی گئی ہے، جس کے ذریعے تنظیمی ڈھانچے کو مزید وسیع اور فعال بنانے کی کوشش کی گئی ہے۔
اس نئی ورکنگ کمیٹی کی ایک نمایاں خصوصیت یہ ہے کہ اس میں عام پس منظر سے تعلق رکھنے والے اور بغیر کسی سیاسی وراثت کے نوجوانوں کو بڑی تعداد میں موقع دیا گیا ہے۔ تنظیم کے لیے زمینی سطح پر مسلسل کام کرنے والے کارکنان کو ترجیح دی گئی ہے، جس سے یوتھ کانگریس میں نئی توانائی اور جوش پیدا ہونے کی امید ظاہر کی جا رہی ہے۔
پارٹی قیادت کے مطابق اس فیصلے کے بعد ریاست بھر میں نوجوانوں کے درمیان کانگریس اور یوتھ کانگریس کے تئیں ایک مثبت فضا قائم ہوئی ہے، اور مختلف حلقوں کی جانب سے اس اقدام کا خیرمقدم کیا جا رہا ہے۔ شیوراج مورے نے اس موقع پر کہا کہ نئی ٹیم کانگریس کے نظریات کو گاؤں اور مقامی سطح تک پہنچانے کے ساتھ ساتھ نوجوانوں کے مسائل پر مؤثر انداز میں آواز اٹھائے گی اور عملی تحریکیں چلائے گی۔
MPCC Urdu News1. 1 April 26.docx