نئی دہلی، 20 مئی: (ورق تازہ نیوز)آل انڈیا کانگریس کمیٹی نے مہاراشٹر میں تنظیمی ڈھانچے کو مزید مضبوط بنانے کے لیے اہم فیصلے کرتے ہوئے ریاست بھر میں ضلعی کانگریس کمیٹیوں کی نئی تشکیل اور نئے ضلع صدور کے تقرر کا اعلان کردیا ہے۔ یہ اعلان کانگریس کے جنرل سیکریٹری کے سی وینوگوپال کی جانب سے جاری کردہ پریس ریلیز میں کیا گیا۔
پریس ریلیز کے مطابق کانگریس صدر نے مہاراشٹر میں تنظیمی اضلاع کی ازسرنو تشکیل کی تجویز کو منظوری دی ہے تاکہ پارٹی کی تنظیمی کارکردگی کو مؤثر بنایا جاسکے۔ اس کے ساتھ ہی نئی تشکیل شدہ ضلعی کانگریس کمیٹیوں کے صدور کی تقرری کو بھی فوری اثر سے نافذ کردیا گیا ہے۔
بیان میں کہا گیا ہے کہ یہ تقرریاں “سنگٹھن سرجن ابھیان” کے تحت عمل میں لائی گئی ہیں۔ اس مہم کے دوران آل انڈیا کانگریس کمیٹی کے مبصرین نے مختلف اضلاع کا تفصیلی جائزہ لیا، پارٹی عہدیداران اور دیگر متعلقہ افراد سے ملاقاتیں کیں اور اپنی جامع رپورٹیں پارٹی قیادت کو پیش کیں۔ ان رپورٹس پر غور کے بعد سینئر قائدین اور مبصرین کے ساتھ تبادلۂ خیال کرکے نئے صدور کے ناموں کو منظوری دی گئی۔
مہاراشٹر کے مختلف اضلاع کے لیے جن رہنماؤں کو ضلع کانگریس کمیٹی کا صدر مقرر کیا گیا ہے، ان میں ناندیڑ سٹی کے لیے عبدالغفار، ناندیڑ رورل نارتھ کے لیے ڈاکٹر وِٹل گنگادھر پاوڑے اور ناندیڑ رورل ساؤتھ کے لیے رویندر وسنت راؤ چوہان شامل ہیں۔
اسی طرح پربھنی سٹی کے لیے روی راج اشوک راؤ دیشمکھ، پربھنی رورل کے لیے عبداللہ خان درانی (باباجانی)، ہنگولی کے لیے ڈاکٹر ستیش یشونت راؤ پچپوتا، اکولہ سٹی کے لیے مہیندر گواہی اور ناسک سٹی کے لیے نیلیش ارجن کھیرے (ببلو کھیرے) کو ذمہ داری سونپی گئی ہے۔
کانگریس قیادت کے اس فیصلے کو مہاراشٹر میں پارٹی تنظیم کو ازسرنو متحرک کرنے اور آئندہ بلدیاتی و اسمبلی انتخابات کی تیاری کے طور پر دیکھا جا رہا ہے۔
