معذور افراد کی بہبود کے لیے ضلعی سالانہ منصوبے سے 1% فنڈ مختص
نائب وزیر اعلیٰ اجیت پوار کی اطلاع، حکومت نے سرکاری حکم نامہ جاری کر دیا
ممبئی (آفتاب شیخ)
مہاراشٹر حکومت نے معذور افراد کی فلاح و بہبود اور انہیں خود مختار بنانے کے لیے ایک اہم اقدام اٹھایا ہے۔ اب ہر سال ضلعی سالانہ منصوبہ (جنرل) 2025-26 کے تحت مختص کردہ فنڈز کا زیادہ سے زیادہ 1 فیصد معذور افراد کی فلاحی اسکیموں کے لیے مخصوص کیا جائے گا۔ اس فیصلے کا اعلان نائب وزیر اعلیٰ اور وزیر خزانہ و منصوبہ بندی اجیت پوار نے کیا۔
2011 کی مردم شماری کے مطابق، مہاراشٹر کی کل آبادی کا 2.63 فیصد حصہ معذور افراد پر مشتمل ہے۔ ان کی سماجی و اقتصادی ترقی کو یقینی بنانے کے لیے ریاستی حکومت نے ضلعی سالانہ منصوبے میں خصوصی بجٹ مختص کرنے کا فیصلہ کیا ہے۔
یہ فیصلہ 5 فروری 2025 کو منعقدہ ریاستی سطح کی ضلعی سالانہ منصوبہ (جنرل) 2025-26 میٹنگ میں کیا گیا، جس کے بعد محکمہ منصوبہ بندی نے پیر کو اس حوالے سے سرکاری حکم نامہ جاری کیا۔
ضلعی سالانہ منصوبے (جنرل) کے تحت، 5 فیصد فنڈ نئی اسکیموں، پائیدار ترقیاتی اہداف، تشخیص، نگرانی اور ڈیٹا انٹری کے لیے مختص کیا گیا ہے، جبکہ 19 فیصد فنڈ مختلف انتظامی محکموں کی باقاعدہ اسکیموں کے لیے مخصوص ہے۔
اجیت پوار نے مزید کہا کہ "معذور افراد کی خود مختاری اور فلاح و بہبود" کے لیے مختص کیے گئے 1 فیصد فنڈز کے شفاف اور مؤثر استعمال کو یقینی بنانے کے لیے، محکمہ منصوبہ بندی اور محکمہ خزانہ کی منظوری سے محکمہ بہبودِ معذوراں کی جانب سے واضح احکامات جاری کیے جائیں گے۔
ریاستی حکومت کے اس فیصلے سے معذور افراد کی ترقی اور فلاح و بہبود کو مزید تقویت ملے گی اور انہیں سماج کے مرکزی دھارے میں شامل کرنے میں مدد حاصل ہوگی۔
