ممبئی :(ورق تازہ نیوز)مہاراشٹر حکومت کی “لاڈکی بہن یوجنا” کے تحت مستحق خواتین کو مارچ اور اپریل کے مہینوں کی ایک ساتھ 3000 روپے کی رقم جاری کی گئی ہے۔ تاہم بڑی تعداد میں خواتین کو اب تک یہ رقم موصول نہیں ہوئی، جس کی بنیادی وجہ e-KYC میں تاخیر اور دیگر تکنیکی مسائل بتائے جا رہے ہیں۔
کئی خواتین نے سوال اٹھایا ہے کہ آخر انہیں ان کا حق کب ملے گا۔ اس کے ساتھ ہی یہ بھی مطالبہ سامنے آیا ہے کہ اگر e-KYC مکمل نہ ہونے یا کسی غلطی کی وجہ سے ماہانہ 1500 روپے کا فائدہ نہیں مل رہا، تو دوبارہ e-KYC کرنے کا موقع دیا جائے۔ذرائع کے مطابق تقریباً 70 لاکھ خواتین یا تو نااہل قرار دی گئی ہیں یا ان کی درخواستوں میں خامیاں پائی گئی ہیں، جس کے باعث انہیں اس مرحلے میں فائدہ نہیں ملا۔
اسی پس منظر میں e-KYC کی آخری تاریخ بڑھانے کا مطالبہ زور پکڑ رہا ہے۔اسی دوران نائب وزیر اعلیٰ ایکناتھ شندے نے ایک عوامی جلسے میں اہم بیان دیتے ہوئے اشارہ دیا ہے کہ خواتین کو دوبارہ e-KYC مکمل کرنے کا موقع دیا جا سکتا ہے۔ ان کے اس بیان کے بعد امید کی جا رہی ہے کہ حکومت جلد اس حوالے سے باضابطہ اعلان کرے گی۔اگر ایسا ہوتا ہے تو ہزاروں نہیں بلکہ لاکھوں خواتین کو بڑی راحت ملے گی اور وہ اس سرکاری اسکیم سے فائدہ اٹھا سکیں گی۔