عراق میں امریکی ائیر بیس پر ایران کا حملہ، 80 افراد ہلاک، اسرائیل نے کیا ہائی الرٹ

برطانوی وزیرِ خارجہ: ایران کا حملہ ’خطرناک اور نتائج کی پروا کے بغیر تھا‘
برطانیہ کے وزیرِ خارجہ ڈومینک راب نے کہا ہے کہ برطانیہ ایران کی جانب سے ان عراقی فوجی اڈوں پر حملوں کی مذمت کرتا ہے جہاں برطانوی، امریکی اور اتحادی افواج کے ارکان مقیم ہیں۔

ان کا کہنا ہے کہ انھیں حملوں میں ہلاکتوں اور بیلسٹک میزائلوں کے استعمال کی اطلاعات پر تشویش ہے۔

انھوں نے کہا ’ہم ایران پر زور دیتے ہیں کہ وہ ایسے خطرناک اور لاپرواہ حملوں کو نہ دہرائے اور حالات معمول پر لانے کی کوشش کرے۔‘

برطانوی وزیرِ خارجہ نے کہا کہ ’مشرقِ وسطیٰ میں ایک جنگ صرف داعش اور دیگر دہشت گرد گروہوں کی مدد کرے گی۔‘
واشنگٹن: ایران نے قاسم سلیمانی کی ہلاکت کا انتقام لینے کے لئے بدھ کے روز عراق میں امریکی فوج اور اس کی اتحاد ی فورس پر درجنوں میزائل حملے کیے۔ سپاہ پاسدارنِ انقلابِ اسلامی ( آئی آر جی ایس) نے بدھ کی صبح الا سد ائیر بیس پر 35 راکٹ داغے۔ الاسد ائیر بیس پر امریکی فوج تعینات ہے۔ خبروں کے مطابق اس حملے میں 80 لوگوں کے مارے جانے کی خبر ہے، اس میں 20 فوجی جوان بھی شامل ہیں۔

عراق میں امریکی فوجی ٹھکانے پر ایرانی حملے کے پیش نظر اسرائیل نے اپنی فضائیہ کو ہائی الرٹ کر دیا ہے۔ مقامی میڈیا نے بدھ کو بتایا کہ اس وقت اسرائیلی فضائیہ کے طیارے لبنان کے علاقے میں پرواز پر ہے۔ اس سے قبل ایران کی میڈیا نے رپورٹ دی تھی کہ ایران نے امریکہ اور اس کے اتحادیوں کو انتباہ دیا ہے کہ اگر امریکہ ایران پر حملے کے لیے ان علاقوں اور فوجی اڈوں کا استعمال کرے گا تو ان پر حملہ کیا جائے گا۔ ایران کی پاسدارانِ انقلابِ اسلامی کی القدس فورس (آئی آر جی ایس) نے عراق میں امریکی فوجی اڈوں اربیل اور الاسد ائیر بیس کو نشانہ بناتے ہوئے میزائل سے حملہ کیا تھا۔ امریکہ کے ڈرون راکٹ حملے میں گزشتہ جمعہ کو ایران کے کمانڈر جنرل قاسم سلیمانی سمیت کئی لوگوں کی ہلاکت کے بعد ایران کی سیکورٹی فورسز نے انتقام لینے کی دھمکی دی تھی۔

وہیں ایرانی میزائل حملے کے بعد امریکی فوج بھی متحرک ہوگئی ہے، ایران کے مغربی عراق میں واقع الاسد فضائی اڈوں پر میزائل حملہ کرنے کے بعد مشرقی شام میں واقع امریکی فوج متحرک ہو گئی ہے۔ ایرانی میڈیا کے مطابق سپاہ پاسدارانِ انقلاب اسلامی کی القدس فورس ( آئی آرجی ایس) نے اعلان کیا ہے کہ فضائی اڈوں پر حملہ کمانڈر قاسم سلیمانی کی ہلاکت کا انتقام لینے کے لئے کیا گیا ہے۔ ترجمان سٹیفنی گریشم نے تصدیق کرتے ہوئے کہا کہ عراق میں میں واقع امریکی ائیر بیس پر حملے کے واقعہ سے وائٹ ہاؤس با خبر ہے اور صدر ڈونلڈ ٹرمپ حالات پر نظر بنائے ہوئے ہیں۔

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-