ناندیڑ، 10 جولائی: ضلع کلکٹر راہول کرڈیلے نے کہا ہے کہ مزدوروں کے خاندانوں کو حکومت کی تعلیمی اور صحت سے متعلق سہولیات کا بھرپور فائدہ اٹھانا چاہیے۔ وہ آج واجےگاو?ں کے نووبل فنکشن ہال میں ضلع انتظامیہ کی جانب سے منعقدہ مزدوروں کے رجسٹریشن اور صحت کیمپ سے خطاب کر رہے تھے۔ یہ کیمپ غیر منظم شعبے کے مزدوروں کی زندگی کو بہتر بنانے اور انہیں سرکاری اسکیموں سے جوڑنے کے لیے ضلع انتظامیہ کے ایک انوکھے اقدام کے تحت منعقد کیا گیا۔
اس موقع پر ضلع صحت افسر ڈاکٹر سنگیتا دیشمکھ، مزدور فلاح و بہبود کے معاون کمشنر انکیت تھورات، سب ڈویڑنل آفیسر ڈاکٹر سچن کھلل، تحصیلدار سنجے وارکڈ، تعلقہ صحت افسر ڈاکٹر پروین منڈے، نائب تحصیلدار سنیل ماچےواڈ، سنجے ناگمواڈ اور واجےگاو?ں کے سرپنچ جمیل سیٹھ موجود تھے۔ضلع کلکٹر نے کہا کہ محروم اور پسماندہ طبقات تک سرکاری اسکیمیں پہنچانے کے لیے مختلف اقدامات کیے جا رہے ہیں۔ انہی کوششوں کے تحت آج کا کیمپ منعقد کیا گیا، جس میں خواتین اور غیر منظم مزدوروں کو ایک ہی جگہ پر صحت، تعلیم سمیت دیگر سہولیات فراہم کی گئیں۔
انہوں نے عوام سے اپیل کی کہ وہ ان سہولیات سے بھرپور فائدہ اٹھائیں۔کیمپ میں مختلف سہولت مراکز لگائے گئے، جن میں مزدوروں کی رجسٹریشن، آیوشمان کارڈ، اور طبی کیمپ کے اسٹال شامل تھے۔ خواتین کی بڑی تعداد نے اس کیمپ میں حصہ لیا۔ سی ایس سی مراکز کے آپریٹروں نے رجسٹریشن میں بڑھ چڑھ کر حصہ لیا۔ڈاکٹر سنگیتا دیشمکھ نے خواتین کو صحت کے متعلق معلومات دی اور طبی جانچ کی ترغیب دی، جبکہ انکیت تھورات نے مزدوروں کے لیے سرکاری اسکیموں سے متعلق رہنمائی فراہم کی۔کیمپ کے دوران 491 افراد کی طبی جانچ، 156 کی خون کی جانچ، 16 افراد کی ECG، 145 کو آیوشمان کارڈ کی فراہمی، اور 225 مزدوروں کی ای-شرم پورٹل پر رجسٹریشن کی گئی۔ مجموعی طور پر 1,033 افراد کو مختلف سہولیات فراہم کی گئیں۔
