ممبئی : (ورق تازہ نیوز)ممبئی، تھانے سمیت پورے مہاراشٹر میں گزشتہ روز سے مسلسل موسلا دھار بارش کا سلسلہ جاری ہے۔ شدید بارش کے باعث مختلف اضلاع میں جانی نقصان کے افسوسناک واقعات پیش آئے ہیں۔ کہیں لوگ سیلابی ریلے میں بہہ گئے، کہیں بجلی کا کرنٹ جان لیوا ثابت ہوا، تو کہیں دیوار گرنے سے قیمتی جانیں ضائع ہوئیں۔ مسلسل بارش نے کئی خاندانوں کو غم میں مبتلا کر دیا ہے۔
پالگھر میں دیوار گرنے سے خاتون جاں بحق
ضلع پالگھر کے آگری پاڑا علاقے میں ایک چال کی کمزور دیوار اچانک گرنے سے رابعہ شبیر سید (47 سال) جاں بحق ہوگئیں۔ بدھ کے روز دن بھر ہونے والی بارش کے بعد شام کے وقت رابعہ سید اپنے کمرے کے قریب جمع پانی نکال رہی تھیں کہ اسی دوران بارش سے کمزور ہو چکی دیوار ان پر آگری۔ شدید زخمی حالت میں انہیں فوری طور پر ایک نجی اسپتال منتقل کیا گیا، تاہم علاج کے دوران وہ دم توڑ گئیں۔ اس واقعے پر علاقے میں گہرے رنج و غم کا اظہار کیا جا رہا ہے، جبکہ پالگھر پولیس نے حادثاتی موت کا مقدمہ درج کر لیا ہے۔
سوریا ندی میں ماہی گیری کے دوران کسان بہہ گیا
پالگھر ضلع میں مسلسل بارش کے باعث دریاؤں میں پانی کی سطح خطرناک حد تک بڑھ گئی ہے۔ اسی دوران ڈہانو تعلقہ کے پیتھ کیدارپاڑا گاؤں کے رہائشی وٹھل جانے کیدار سوریا ندی میں مچھلی پکڑنے گئے تھے، جہاں تیز بہاؤ میں بہہ جانے کا افسوسناک واقعہ پیش آیا۔ مقامی دیہاتیوں کی مدد سے ان کی تلاش کے لیے سرچ آپریشن جاری ہے۔
محکمہ موسمیات نے آئندہ دو دنوں تک ضلع میں مزید شدید بارش کی پیش گوئی کی ہے۔ ضلعی انتظامیہ نے شہریوں سے اپیل کی ہے کہ وہ دریاؤں، نالوں اور سیلاب زدہ علاقوں کے قریب جانے سے گریز کریں۔
ناگپور میں بجلی کا کرنٹ لگنے سے بزرگ خاتون کی موت
ناگپور کے تاج باغ علاقے کی گاؤسیہ کالونی میں بدھ کی رات ایک بزرگ خاتون سڑک پر بجلی کا کرنٹ لگنے سے جاں بحق ہوگئیں۔ واقعے کے بعد علاقے میں شدید غم و غصہ پایا جا رہا ہے۔
مقامی شہریوں کا الزام ہے کہ گٹر لائن کی کھدائی کے دوران اسٹریٹ لائٹ کی زیر زمین بجلی کی کیبل کو نقصان پہنچا تھا، جس میں کرنٹ آنے کے باعث خاتون اس کی زد میں آگئیں اور موقع پر ہی دم توڑ دیا۔ شہریوں نے میونسپل کارپوریشن اور متعلقہ ٹھیکیدار کی لاپرواہی پر سخت سوالات اٹھاتے ہوئے کہا کہ کھدائی کے بعد مناسب حفاظتی اقدامات نہیں کیے گئے، جس کے نتیجے میں یہ المناک حادثہ پیش آیا۔