نیوز ایجنسی روئٹرز کی ایک رپورٹ کے مطابق متحدہ عرب امارات کے نائب صدر اور دبئی کے امیر شیخ محمد بن راشد المکتوم کی بیوی شہزادی حیا بنت الحسین اپنے دو بچوں کے ہمراہ دبئی سے فرار ہو کر جرمنی پہنچ گئی ہیں۔
جرمنی کے کثیر الاشاعتی روزنامہ بلڈ نے لکھا ہے کہ شہزادی حیا اپنی گیارہ سالہ بیٹی اور سات سالہ بیٹے کے ہمراہ جرمن سفارت کار کی مدد سے دبئی سے فرار ہونے میں کامیاب ہوئیں۔
ابھی تک جرمن یا متحدہ عرب امارات کے حکام نے اس بات کی تصدیق نہیں کی۔ تاہم شہزادی حیا اور ان کے بچوں کو رواں برس جنوری کے بعد سے کسی عوامی جگہ پر نہیں دیکھا گیا۔
پینتالیس سالہ شہزادی حیا شیخ محمد کی چھٹی بیوی ہیں اور وہ اردن کے موجودہ بادشاہ عبداللہ کی سوتیلی بہن بھی ہیں۔ برطانوی اخبار دی سن نے لکھا ہے کہ شہزادی حیا کو خدشہ تھا کہ یو اے ای میں ان کی زندگی کو خطرہ لاحق ہو سکتا ہے۔
علاوہ ازیں اخبار دی سن کے مطابق برطانیہ کی بجائے جرمنی میں سیاسی پناہ کی درخواست جمع کرانے کی بظاہر وجہ یہ بھی ہے کہ شہزادی حیا کو خدشہ تھا کہ لندن حکومت انہیں واپس متحدہ عرب امارات بھیج دے گی۔
اس خدشے کی ایک وجہ یہ بھی ہے کہ دبئی کے امیر کی ایک بیٹی فرار ہو کر برطانیہ پہنچی تھیں لیکن حکام نے انہیں واپس بھیج دیا تھا۔ علاوہ ازیں شیخ محمد کی ایک اور بیٹی شہزادی لطیفہ نے بھی فرار ہونے کی کوشش کی تھی لیکن بھارتی بحریہ نے انہیں گرفتار کر کے واپس متحدہ عرب امارات کے حوالے کر دیا تھا۔
یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-