حیدرآباد: بزم رحمت عالم کی جانب سے ہر سال کی طرح امسال بھی جشن میلاد النبی عالیشان پیمانہ پر منایا جارہا ہے۔ماضی کی روایتوں کے مطابق اس سال بھی بزم کے ذمہ داران نے ’رحمت عالم انٹرنیشنل پیس ایوارڈ 2019‘ کی پیشکشی کا فیصلہ کیا ہے۔ واضح رہے کہ بزم کی جانب سے گذشتہ تین برسوں سے انٹرنیشنل پیس ایوارڈ عطا کیا جارہا ہے۔
بزم رحمت عالم کی جانب سے جلسہ میلاد النبی کا 10 نومبر اتوار کو مدینہ ایجوکیشن سنٹر نامپلی میں 11 بجے دن انعقاد عمل میں آئے گا جس میں مشہور و معروف علمائے کرام اور مشائخین عظام کے علاوہ معززین شہر و دانشوروں کی موجودگی میں ایوارڈ کی پیشکشی عمل میں آئے گی۔ بزم، اسلامی تعلیمات کو عام کرنے اور اسلام پیغام انسانیت کو فروغ دینے میں گراں قدر خدمات انجام دینے والے غیر مسلم اصحاب کو یہ ایوارڈ عطا کرتی ہے۔
بزم کے صدرنشین جناب ایم اے مجیب سینئر ایڈوکیٹ ہائی کورٹ نے بتایا کہ جاریہ سال عالمی امن ایوارڈ مشہور و معروف عیسائی ادارہ ہنری مارٹن کے ڈائرکٹر ڈاکٹر پاکیم ٹی سامیول کو دینے کا فیصلہ کیا ہے۔ایم اے مجیب نے بتایا کہ عالمی سطح بالخصوص حیدرآباد میں ہنری مارٹن انسٹی ٹیوٹ محتاج تعارف نہیں ہے یہ تحقیق ‘ بین مذہبی تعلقات اور رواداری کا ایک عالمی مرکز ہے۔ادارہ کا مقصد مختلف مذاہب کے ماننے والوں کے درمیان اخوت اور بھائی چارگی کو فروغ دینا ہے۔
ڈاکٹر پاکیم ٹی سامیول ‘ زکواۃ فاؤنڈیشن آف انڈیا کے رکن عاملہ ہیں اورانہوں نے ویسٹ منیسٹر کالج ‘ آکسفورڈ سے اسلامک اسٹیڈیز میں پی ایچ ڈی کی ڈگری حاصل کی ہے۔ہنری مارٹن انسٹی ٹیوٹ میں عربی ‘ سنسکرت’ اردو ‘ فارسی کے لینگویج کورسس بھی ہیں اس کے علاوہ اسلام اور بین مذہبی تعلقات پر پوسٹ گریجویٹ ڈپلومہ کی بھی سہولت ہے۔اس سلسلہ میں جناب ایم اے مجیب صدر بزم رحمت عالم کی قیادت میں ایک وفد نے ڈاکٹر پاکیم ٹی سامیول سے ملاقات کی اور ان کی خدمات کے اعتراف میں ایوارڈ کا اعلان کیا۔
یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-