استنبول کے صنعتی زون میں ایک تقریب سے خطاب کرتے ہوئے ترک صدر کا کہنا تھا، ”آج اس ملک کی تاریخ کا ایک اہم دن ہے۔ آج ترکی کا وہ خواب سچ ثابت ہو گیا ہے، جو ہمارا ملک گزشتہ ساٹھ برسوں سے دیکھ رہا تھا۔‘‘
#TürkiyeninOtomobili'ni test ettik.
İnşallah 2022 yılında otomobilimizin seri üretime geçmesiyle birlikte on yıllar boyunca kurmuş olduğumuz hayallere kavuşmuş olacağız.#YeniliğeYolculuk pic.twitter.com/MPq3dX4EQQ
— Recep Tayyip Erdoğan (@RTErdogan) December 27, 2019
ترکی میں کار سازی کے شعبے میں اس وقت دنیا کی بڑی کمپنیاں پیداوار کا سلسلہ جاری رکھے ہوئے ہیں۔ ان میں فورڈ، رینالٹ، ٹویوٹا اور ہنڈائی جیسے ادارے شامل ہیں لیکن ان فیکٹریوں میں ترک ملازمین صرف اسمبلنگ کا کام ہی کرتے ہیں۔ کاروں کے ڈیزائن اور پرزہ جات دیگر ممالک میں تیار ہوتے ہیں یا پھر یورپی ممالک سے درآمد کیے جاتے ہیں۔
ترک صدر کا اس حوالے سے کہنا تھا، ”ہم گزشتہ کئی برسوں سے یہ کہتے آ رہے ہیں کہ ترکی کو اپنی تیار کردہ کاروں کی ضرورت ہے نہ کہ یہاں پر صرف کاروں کو جوڑا جائے۔‘‘ ان کا مزید کہنا تھا، ”ترکی ایک ایسا ملک بن چکا ہے، جو نہ صرف نئی ٹیکنالوجیز کی مارکیٹ ہے بلکہ یہ ایک ایسا ملک بھی ہے، جو ایسی ٹیکنالوجیز برآمد بھی کر رہا ہے۔‘‘
اس کے بعد ترک صدر نے ٹوئٹر پر ایک ویڈیو جاری کی، جس میں وہ ایک کار چلا کر ٹیسٹ کر رہے ہیں۔ انہوں نے ساتھ یہ بھی لکھا کہ وہ ایسی ایک کار اپنے لیے بھی خریدیں گے۔ ترکی میں ‘آٹوموبائل جوائنٹ وینچر گروپ‘ آئندہ پندرہ برسوں میں الیکٹرک کاروں کے پانچ ماڈل تیار کرنا چاہتا ہے۔ اس گروپ میں مجموعی طور پر پانچ کمپنیاں اور ایک بزنس یونین شامل ہیں۔
جمعہ ستائیس دسمبر کو جو دو ماڈل پیش کیے گئے، ان میں سے ایک کا نام الیکٹرک لائٹ ایس یو وی ہے اور ایک سیڈان ہے۔ منصوبہ بندی کے مطابق یہ کاریں بورصہ شہر میں لگائے گئے یونٹ میں تیار کی جائیں گی۔ یہ ترکی کا چوتھا بڑا شمال مغربی شہر ہے۔ وہاں سن دو ہزار بائیس تک سالانہ ایک لاکھ پچھہتر ہزار گاڑیاں تیار ہوں گی۔
اس منصوبے پر تیرہ برسوں میں کُل 22 بلین لیرا (3.7 بلین ڈالر) خرچ ہوں گے اور چار ہزار افراد کو روزگار ملے گا۔ سرکاری معاہدے کے مطابق حکومت اس کے لیے زمین فراہم کرے گی اور ٹیکسوں میں چھوٹ بھی دے گی۔ سن دو ہزار پینتیس تک اس کمپنی کو سالانہ تیس ہزار کاروں کی خریداری کی گارنٹی بھی دے دی گئی ہے۔
یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-