نئی دہلی، 17 مارچ (یو این آئی) عالمی ادارہ صحت (ڈبلیو ایچ او) نے منگل کو خبردار کیا ہے کہ چین اور یورپ کے بعد اب جنوب مشرقی ایشیا میں کورونا وائرس ’كووڈ -19‘ وبا کے تیزی سے پھیلنے کا خدشہ ہے جس میں ہندوستان بھی شامل ہے۔
جنوب مشرقی ایشیا کے لئے تنظیم کی علاقائی ڈائریکٹر ڈاکٹر پونم كھیترپال نے بتایا کہ اب تک اس علاقے میں كووڈ -19 کے 480 معاملات کی تصدیق اور آٹھ افراد کی موت بھی ہو چکی ہے۔ انہوں نے کہا، ’’یہاں انفیکشن تیزی سے بڑھ رہا ہےْ ہمیں وائرس کو اور لوگوں تک پھیلنے سے روکنے کی کوششوں میں فوری طور پر تیزی لانے کی ضرورت ہے۔
وائرس انفیکشن کے بہت سے نئے پاکٹ سامنے آ رہے ہیں۔ یہ ایک طرف سرگرمی اور نگرانی کے طریقہ کار کی کامیابی دکھاتا ہے تو دوسری طرف اس کے انفیکشن کو روکنے کے لئے زیادہ سے زیادہ مؤثر کوشش کی ضرورت بھی عکاسی کرتا ہے۔ واضح طور پر ہمیں جلد سے جلد زیادہ کوشش کرنے کی ضرورت ہے‘‘۔
ڈبلیو ایچ او نے بتایا کہ علاقے کے 11 ممالک میں سے آٹھ میں اس وائرس کے انفیکشن کی تصدیق ہو چکی ہے۔ تھائی لینڈ میں 177، ہندوستان میں 137، انڈونیشیا میں 134، سری لنکا میں 19، مالدیپ میں 13، بنگلہ دیش میں پانچ اور نیپال اور بھوٹان میں ایک ایک کیس سامنے آئے ہیں۔ یہ اعداد و شمار تیزی سے بڑھ رہے ہیں۔ کچھ ممالک میں یہ صاف ہے کہ یہ وبا کمیونٹی سطح پر پھیلني شروع ہو گئی ہے۔