امرتسر: بھارتی پنجاب کے امرتسر میں واقع سری گرو رام داس جی بین الاقوامی ہوائی اڈے کے قریب آسمان پر ڈرون نما مشتبہ چیز نظر آنے کے بعد ہلچل مچ گئی۔ حفاظتی اقدامات کے تحت پروازوں کے آپریشن پر اثر پڑا، جس کے نتیجے میں ایک پرواز منسوخ جبکہ دو پروازوں کا رخ دوسرے ہوائی اڈوں کی جانب موڑ دیا گیا۔
اطلاعات کے مطابق ہوائی اڈے کے فضائی حدود میں مشتبہ ڈرون جیسی چیز دکھائی دینے کے بعد ایئرپورٹ حکام اور سکیورٹی ایجنسیاں فوری طور پر الرٹ ہوگئیں۔ احتیاطی طور پر فضائی آپریشن متاثر ہوا اور کچھ پروازوں کو تاخیر کا سامنا بھی کرنا پڑا۔
حکام کی جانب سے ابتدائی طور پر اس بات کی تصدیق نہیں کی گئی کہ آسمان پر نظر آنے والی چیز واقعی ڈرون ہی تھی یا کوئی دوسری چیز۔ واقعے کی تحقیقات کی جا رہی ہیں۔
امرتسر ہوائی اڈہ بھارت اور پاکستان کی سرحد کے قریب واقع ہے، اس لیے فضائی حدود میں کسی بھی مشتبہ ڈرون یا نامعلوم چیز کی موجودگی کو سکیورٹی کے اعتبار سے انتہائی سنجیدگی سے لیا جاتا ہے۔ اس سے قبل بھی امرتسر ایئرپورٹ پر ڈرون نما اشیا نظر آنے کے بعد پروازوں کا آپریشن عارضی طور پر متاثر ہو چکا ہے۔ فروری 2026 میں ایسے ہی ایک واقعے کے بعد دو بین الاقوامی پروازوں کا رخ موڑ دیا گیا تھا۔
سکیورٹی حکام کی جانب سے معاملے کی جانچ جاری ہے اور مسافروں کو مشورہ دیا گیا ہے کہ ایئرپورٹ روانہ ہونے سے قبل اپنی متعلقہ ایئرلائن سے پرواز کی تازہ صورتحال معلوم کرلیں