ممبئی: بالی ووڈ کے سپر اسٹار سلمان خان کے والد اور ہندی فلم انڈسٹری کے معروف و ممتاز اسکرین پلے رائٹر سلیم خان کی طبیعت ناساز ہونے کے باعث انہیں اسپتال میں داخل کرایا گیا ہے۔
اطلاعات کے مطابق آج صبح تقریباً ساڑھے آٹھ بجے انہیں ممبئی کے لیلاوتی اسپتال میں ایمرجنسی کے تحت لایا گیا، جہاں فوری طبی امداد فراہم کی گئی۔ ابتدائی علاج کے بعد انہیں اسپتال کی تیسری منزل پر واقع آئی سی یو میں منتقل کر دیا گیا، جہاں ماہر ڈاکٹروں کی نگرانی میں ان کا علاج جاری ہے۔
اسپتال انتظامیہ کی جانب سے جاری بیان میں کہا گیا ہے کہ سلیم خان کی حالت فی الحال مستحکم ہے، تاہم احتیاطاً انہیں چوبیس گھنٹے ڈاکٹروں کی نگرانی میں رکھا گیا ہے۔ ان کے علاج کی نگرانی معروف معالج ڈاکٹر جلیل پارکر کر رہے ہیں۔ میڈیکل ٹیم میں نیورولوجسٹ ڈاکٹر نتین ڈانگے اور ڈاکٹر بنیت آہلووالیا بھی شامل ہیں۔ اہلِ خانہ کی درخواست پر فی الحال مزید تفصیلات جاری نہیں کی جا رہیں، البتہ کل صبح گیارہ بجے خاندان کی اجازت سے باضابطہ میڈیکل بلیٹن جاری کیے جانے کا امکان ہے۔
سلیم خان کی عمر نوے برس بتائی جا رہی ہے۔ خبر ملتے ہی ان کے صاحبزادے سلمان خان، صاحبزادی الویرا اگنی ہوتری اور دیگر قریبی رشتہ دار فوراً اسپتال پہنچ گئے۔ ذرائع کے مطابق خاندان کے افراد خاصے فکرمند دکھائی دیے، جبکہ مداحوں کی جانب سے سلیم خان کی جلد صحت یابی کے لیے دعاؤں کا سلسلہ جاری ہے۔
واضح رہے کہ سلیم خان 1935 میں مدھیہ پردیش کے شہر اندور میں پیدا ہوئے۔ انہوں نے 1964 میں سشیلا چرک سے شادی کی، جن کا نام بعد میں سلمیٰ رکھا گیا۔ بعد ازاں انہوں نے اداکارہ ہیلن سے دوسری شادی کی۔ ان کے بچوں میں سلمان خان، ارباز خان، سہیل خان اور الویرا اگنی ہوتری شامل ہیں، جبکہ ارپیتا کو انہوں نے گود لیا تھا۔
سلیم خان نے جاوید اختر کے ساتھ مل کر ہندی سنیما کو بے شمار کامیاب فلمیں دیں۔ ان کی تحریر کردہ فلمیں آج بھی کلاسک کا درجہ رکھتی ہیں اور فلمی دنیا میں ان کا نام انتہائی احترام سے لیا جاتا ہے۔