بیلجیم کے ایسٹ فلینڈرز علاقے میں ایک پرانے مکان کی تزئین و آرائش کے دوران ایسا خزانہ سامنے آیا کہ وہاں کام کرنے والے مزدور بھی حیران رہ گئے۔ مکان میں نئے سیوریج پائپ بچھانے کا کام جاری تھا اور مزدور بنیاد کے قریب کھدائی کر رہے تھے۔ اسی دوران اچانک دیوار کے اندر سے زرد رنگ کا ایک مادہ نظر آنے لگا۔
ابتدائی طور پر مزدوروں کو سمجھ نہیں آیا کہ یہ کیا چیز ہے۔ لیکن مزید کھدائی کی گئی تو وہاں سونے کی اینٹیں اور سکے برآمد ہوئے۔ اس منظر نے سب کو حیران کر دیا۔
اس خزانے کی دریافت کرنے والوں میں موسم گرما کی چھٹیوں کے دوران کام کرنے والا ایک 18 سالہ طالب علم بھی شامل تھا۔ نوجوان کو ابتدا میں لگا کہ شاید وہاں عام ایک یورو کے سکے موجود ہیں، لیکن جب اس نے سونے کا ایک ٹکڑا دیکھا تو اسے اندازہ ہوا کہ معاملہ انتہائی قیمتی ہے۔
کھدائی کے دوران سونے کے سکوں سے بھری ایک پلیٹ بھی ملی۔ اس کے علاوہ سونے کی اینٹیں اور دیگر قیمتی اشیا بھی برآمد ہوئیں۔ ابتدائی اندازے کے مطابق اس خزانے کی مالیت تقریباً 90 لاکھ یورو بتائی جا رہی ہے، جو ہندوستانی کرنسی میں تقریباً 100 کروڑ روپے کے آس پاس بنتی ہے۔
یہ خزانہ آخر وہاں کس نے اور کب چھپایا تھا، اس حوالے سے ابھی کئی سوالات موجود ہیں۔ ماہرین اور متعلقہ حکام کی جانب سے اس دریافت کی مزید جانچ کی جا رہی ہے۔
مکان میں پائپ بچھانے کے معمولی کام کے دوران اتنا بڑا خزانہ ملنے کی خبر نے مقامی سطح پر بھی لوگوں کی توجہ حاصل کرلی ہے۔ 18 سالہ طالب علم کے لیے یہ واقعہ یقیناً زندگی بھر یاد رہنے والا تجربہ بن گیا، کیونکہ جس جگہ وہ چند گھنٹوں کی مزدوری کے لیے پہنچا تھا، وہیں اس کی آنکھوں کے سامنے کروڑوں روپے مالیت کا سونا نکل آیا۔