نئی دہلی: حکومتِ ہند نے ملک کے کروڑوں گھریلو ایل پی جی (LPG) صارفین کے لیے ایک اہم اطلاع جاری کی ہے۔ وزارتِ پیٹرولیم و قدرتی گیس نے تمام گھریلو گیس صارفین کو ہدایت دی ہے کہ وہ جلد از جلد اپنی ای۔کے وائی سی (e-KYC) مکمل کر لیں، بصورتِ دیگر مستقبل میں گیس سلنڈر کی فراہمی میں دشواری پیش آ سکتی ہے۔
وزارت کے مطابق e-KYC عمل آدھار کے بایومیٹرک تصدیقی نظام کے ذریعے کیا جاتا ہے۔ اس کا مقصد یہ یقینی بنانا ہے کہ گیس کنکشن صرف حقیقی اور مستحق صارفین ہی استعمال کریں۔ اس اقدام کے ذریعے فرضی یا غلط استعمال کو روکنا حکومت کا بنیادی ہدف ہے۔
اب یہ ہدایت کیوں جاری کی گئی؟
حال ہی میں بعض علاقوں میں ایل پی جی سلنڈر کی دستیابی کے حوالے سے خدشات ظاہر کیے گئے ہیں۔ مشرقِ وسطیٰ میں بڑھتی ہوئی کشیدگی کے باعث عالمی توانائی سپلائی متاثر ہونے کا امکان ہے۔ اسی وجہ سے حکومت چاہتی ہے کہ گیس کی تقسیم کا نظام شفاف اور منظم انداز میں جاری رہے۔
e-KYC کیوں ضروری ہے؟
حکومت کے مطابق e-KYC مکمل ہونے سے گیس کی تقسیم میں دھوکہ دہی کے امکانات کم ہوں گے، نظام زیادہ مؤثر طریقے سے چلے گا اور صارفین کو گیس سلنڈر حاصل کرنے میں کسی قسم کی پریشانی کا سامنا نہیں کرنا پڑے گا۔
e-KYC کیسے مکمل کریں؟
وزارتِ پیٹرولیم کے مطابق e-KYC کا عمل بالکل مفت اور نہایت آسان ہے۔ صارفین اپنے موبائل فون کے ذریعے گھر بیٹھے چند منٹوں میں اسے مکمل کر سکتے ہیں۔ اس کے لیے پہلے اپنی گیس کمپنی کا موبائل ایپ ڈاؤن لوڈ کریں، ایپ میں لاگ اِن ہونے کے بعد e-KYC کا آپشن منتخب کریں۔ اس کے بعد Aadhaar FaceRD ایپ ڈاؤن لوڈ کرنی ہوگی جس کے ذریعے چہرے کی بایومیٹرک تصدیق کی جاتی ہے۔ تصدیق مکمل ہوتے ہی صارف کی شناخت کی توثیق ہو جاتی ہے اور e-KYC کامیابی کے ساتھ مکمل ہو جاتی ہے۔
حکومت نے تمام صارفین سے اپیل کی ہے کہ وہ جلد از جلد اپنا e-KYC مکمل کریں تاکہ گیس کی فراہمی میں کسی قسم کی رکاوٹ پیدا نہ ہو۔۔