اہم خبریں: معروف کارٹونسٹ سدھیر ڈار چل بسے

by

معروف کارٹونسٹ سدھیر ڈار چل بسے

نئی دہلی: کارٹونست سدھیر ڈار کا منگل کے روز دل کا دورہ پڑنے سے انتقال ہوگیا۔ ان کی عمر 87برس تھی۔ یہ اطلاع خاندان کے ذرائع نے دی ہے۔ الہ آباد میں پیدا ہوئے ڈار نے اپنے کیریئر کا آغاز آکاشوانی سے کیا۔ انہوں نے ریڈیو میں ایک پروگرام کے دوران ’اسٹیٹس مین‘ کے ایڈیٹر کا ہی کارٹون بنادیا تھا جس کے بعد انہیں اخبار میں کام کرنے کا آفر ملا۔

اس کے بعد ان کے کارٹون ہندوستان ٹائمس، دی انڈی پنڈنٹ، دی پائنیئر، دہلی ٹائمس، نیویارک ٹائمس سمیت متعدد اخبارات میں شائع ہونے لگے۔ اس کے علاوہ وہ وزارت سیاحت، وزارت خارجہ کے لئے ڈائری بناتے تھے اور انہوں نے ورلڈ بینک کے لئے بیس برسوں تک کلینڈر بھی بنایا۔ کئی ایوارڈ جیت چکے ڈار کو ایڈیٹوریل کارٹونسٹ کی دوسری نسل کے نمائندہ کے طور پر جانا جاتا ہے۔

جگدانند سنگھ آر جے ڈی کے ریاستی صدر منتخب

پٹنہ: بہار راشٹریہ جنتادل ( آرجے ڈی ) کے سنیئر لیڈر جگدانند سنگھ کو آج بلامقابلہ پارٹی کا ریاستی صدر منتخب کر لیا گیا ہے ۔ آر جے ڈی کے ریاستی الیکشن افسر اور سابق رکن کونسل ڈاکٹر تنویر حسن نے یہاں سابق وزیر جگدانند سنگھ کے ریاستی صدر کے عہدہ پر بلامقابلہ منتخب کئے جانے کا اعلان کیا ۔ ریاستی آرجے ڈی کے صدر عہدہ کے لئے کل واحد نام جگدانند سنگھ نے داخل کیا تھا۔

ڈاکٹر حسن نے کہاکہ جانچ کے بعد جگدانند سنگھ کا پرچہ نامزدگی درست پایا گیا ۔ انہوں نے کہاکہ آج سہ پہر ایک بجے تک پرچہ نامزدگی واپسی کی تاریخ مقرر کی گئی تھی ۔ وقت مقررہ ختم ہونے کے بعد صدر عہدہ کیلئے واحد امیدوار جگدانند سنگھ کو منتخب قرار دے دیا گیا ۔

واضح رہے کہ جگدانند سنگھ بہار کے رام گڑھ سے طویل عرصے تک رکن اسمبلی رہے ہیں اور بکسر لوک سبھا حلقہ سے ایک بار رکن پارلیمنٹ بھی منتخب ہوچکے ہیں۔


مچھلی تاجر سے دو لاکھ 88 ہزار کی لوٹ

پٹنہ: بہار میں دار الحکومت پٹنہ کے دیگھا تھانہ علاقہ میں کرجی پل کے نزدیک بدمعاشوں نے آج مچھلی تاجر سے دو لاکھ 88 ہزار روپے اور اسکوٹی لوٹ لی۔ پولس ذرائع نے یہاں بتایا کہ مچھلی تاجر جتندر کمار اسکوٹی سے جارہے تھے تبھی کرجی پل کے نزدیک دو موٹرسائیکل پر سوار پانچ بدمعاشوںنے اسلحہ کا خوف دکھا کر انہیں روک لیا ۔ اس کے بعد بدمعاشوںنے تاجر سے اسکوٹی اور دو لاکھ 88 ہزار روپے لوٹ لئے۔ ذرائع نے بتایاکہ اس سلسلے میں تاجر نے متعلقہ تھانہ میں ایف آئی آر درج کرائی ہے ۔ معاملے کی تفتیش کی جارہی ہے۔

(یو این آئی)

پی ایم مودی، امت شاہ اور بی جے پی کارگزار صدر جے پی نڈّا کے درمیان میٹنگ

وزیر اعظم نریندر مودی نے ایوان میں اپنے دفتر میں آج مرکزی وزیر داخلہ امت شاہ اور بی جے پی کے کارگزار صدر جے پی نڈا کے ساتھ ایک انتہائی اہم میٹنگ کی۔ میٹنگ میں کن ایشوز پر بات چیت ہوئی، اس سلسلے میں فی الحال جانکاری سامنے نہیں آ سکی ہے۔ لیکن امکان ظاہر کیا جا رہا ہے کہ مہاراشٹر میں پیدا حالات پر بات چیت ہوئی ہوگی۔


سری نگر: کشمیر یونیورسٹی کے پاس گرینیڈ دھماکہ، 3 افراد زخمی

سری نگر واقع کشمیر یونیورسٹی کے دروازے پر گرینیڈ دھماکے کی خبریں موصول ہو رہی ہیں۔ شروعاتی خبروں میں کہا گیا تھا کہ اس دھماکہ میں دو افراد زخمی ہوئے ہیں لیکن تازہ ترین اطلاعات کے مطابق 3 افراد اس دھماکہ کا شکار ہوئے ہیں۔ اس دھماکہ سے متعلق مزید تفصیلات کا ابھی انتظار ہے۔


ایودھیا فیصلہ پر نظرثانی عرضی داخل نہیں کرے گا سنی وقف بورڈ

سنی وقف بورڈ کی آج ہوئی میٹنگ میں ایک بار پھر یہ فیصلہ کیا گیا کہ ایودھیا معاملے پر سپریم کورٹ نے جو فیصلہ سنایا ہے اس کے تحت نظرثانی عرضی داخل نہیں کیا جائے گا۔ میڈیا ذرائع کے مطابق سنی وقف بورڈ کے 6 اراکین نظرثانی عرضی داخل کرنے کے خلاف ہیں۔ اس میٹنگ میں پانچ ایکڑ زمین سے متعلق بھی بات ہوئی لیکن فی الحال یہ طے نہیں ہو سکا ہے کہ سپریم کورٹ کے ذریعہ 5 ایکڑ زمین وقف بورڈ کو دینے کا جو فیصلہ کیا گیا ہے اس زمین کو منظور کیا جائے یا نہیں۔

پارلیمنٹ میں اپوزیشن پارٹیوں کا مظاہرہ، صدر جمہوریہ کے خطاب کا بائیکاٹ

اپوزیشن پارٹی نے آج پارلیمنٹ کے مشترکہ اجلاس میں صدر جمہوریہ رام ناتھ کووند کے خطاب کا بائیکاٹ کرنے کا فیصلہ کیا ہے اور اس کے لیے سبھی اراکین پارلیمنٹ امبیڈکر کے مجسمہ کے سامنے جمع ہونا شروع ہو گئے ہیں۔ اپوزیشن پارٹیوں نے امبیڈکر کے مجسمہ کے پاس ہی احتجاجی مظاہرہ کرنے کا فیصلہ کیا ہے۔ کانگریس رکن پارلیمنٹ راہل گاندھی بھی پارلیمنٹ پہنچ چکے ہیں اور دھیرے دھیرے اراکین پارلیمنٹ کی بھیڑ مجسمہ کے پاس جمع ہو رہی ہے۔



اقتدار میں بیٹھے لوگ آئینی اقدار کو درکنار کر رہے ہیں: پرینکا گاندھی

کانگریس جنرل سکریٹری پرینکا گاندھی نے یوم آئین کے موقع پر ٹوئٹ کر کہا ہے کہ ’’آج یوم آئین ہے اور اقتدار میں بیٹھے لوگ آئینی اقدار کو درکنار کرنے اور جمہوریت میں عوام کی طاقت کمزور کر کے ’پیسہ تنتر‘ کو فروغ دینے کی کوشش کر رہے ہیں۔‘‘


یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-

اپنی رائے یہاں لکھیں

Discover more from ورق تازہ

Subscribe now to keep reading and get access to the full archive.

Continue reading