چین میں لانچ ہونے والی نئی الیکٹرک گاڑی اپنی منفرد "سیمی سالڈ اسٹیٹ” بیٹری کی وجہ سے خبروں میں ہے۔ یہ بیٹری نہ صرف زیادہ طاقتور ہے بلکہ گاڑی کو لمبی رینج فراہم کرنے کی بھی صلاحیت رکھتی ہے۔ روایتی بیٹریوں کے مقابلے میں یہ ٹیکنالوجی زیادہ جدید ہے، جس سے مستقبل میں الیکٹرک کاروں کے شعبے میں بڑی تبدیلیاں متوقع ہیں۔
چین کی بڑی آٹو موبائل کمپنی SAIC Motor اپنی نئی الیکٹرک ایس یو وی لانچ کرنے کی تیاری کر رہی ہے۔ اس گاڑی کا نام MG 4 X ہے اور اس کی سب سے بڑی خاصیت اس میں استعمال ہونے والی سیمی سالڈ اسٹیٹ بیٹری ہے۔
کمپنی اس سے پہلے بھی اپنی ایک الیکٹرک کار میں یہ بیٹری متعارف کرا چکی ہے۔ اب MG 4 X اس بیٹری کے ساتھ آنے والی دوسری گاڑی ہوگی۔ کمپنی نے تصدیق کی ہے کہ اس کی بکنگ 11 مئی سے چین میں شروع ہو جائے گی۔
اب سوال یہ پیدا ہوتا ہے کہ جب ہر الیکٹرک کار میں بیٹری ہوتی ہے تو سیمی سالڈ اسٹیٹ بیٹری میں خاص کیا ہے؟ آئیے اس کے بارے میں جانتے ہیں:
سیمی سالڈ اسٹیٹ بیٹری کیوں خاص ہے؟
یہ عام بیٹریوں کے مقابلے میں زیادہ محفوظ اور طاقتور ہوتی ہے اور تیز رفتار چارجنگ کو بھی سپورٹ کرتی ہے۔
کم خطرہ:
اس بیٹری میں صرف 5 فیصد مائع مواد ہوتا ہے، جس کی وجہ سے آگ لگنے یا دھماکے کا خطرہ تقریباً نہ ہونے کے برابر رہتا ہے۔
لمبی عمر:
یہ بیٹری کئی سال تک کارآمد رہتی ہے اور شدید سردی میں بھی اس کی کارکردگی متاثر نہیں ہوتی، جبکہ عام بیٹریاں سرد موسم میں کمزور پڑ جاتی ہیں۔
فاسٹ چارجنگ:
یہ بیٹری روایتی بیٹریوں کے مقابلے میں بہت تیزی سے چارج ہوتی ہے، جس سے وقت کی بچت ہوتی ہے۔