امریکہ، اسرائیل اور ایران کے درمیان جنگ جلد ختم ہو اور خطے میں امن قائم ہو: ہرش وردھن سپکال
ایران کے قونصل جنرل سعید رضا موسایب متلّغ سے کانگریس ریاستی صدر کی ملاقات
ممبئی: مہاراشٹر پردیش کانگریس کمیٹی کے صدر ہرش وردھن سپکال نے امریکہ، اسرائیل اور ایران کے درمیان جاری جنگی صورتحال پر تشویش کا اظہار کرتے ہوئے کہا ہے کہ اس تنازع کے باعث پوری دنیا متاثر ہو رہی ہے اور ہندوستان میں بھی گیس اور ایندھن کی فراہمی پر اس کے اثرات محسوس کیے جا رہے ہیں۔ انہوں نے امید ظاہر کی کہ یہ جنگ جلد ختم ہو اور ایشیا میں امن و استحکام قائم ہو۔
ہرش وردھن سپکال نے ممبئی میں ایران کے قونصل خانے کا دورہ کیا اور ایران کے قونصل جنرل سعید رضا موسایب متلّغ سے ملاقات کر کے موجودہ صورتحال پر تبادلۂ خیال کیا۔ اس موقع پر مہاراشٹر پردیش کانگریس کے جنرل سکریٹری دھننجے شندے اور سماجی کارکن فیروز میٹھی بوروالا بھی موجود تھے۔
ملاقات کے بعد میڈیا سے گفتگو کرتے ہوئے سپکال نے بتایا کہ اس ملاقات میں انہوں نے ایران کے اعلیٰ رہنما مرحوم آیت اللہ علی خامنہ ای کے انتقال پر تعزیت پیش کی۔ انہوں نے جنگی حملوں میں جاں بحق ہونے والے فوجیوں اور عام شہریوں، خصوصاً 165 اسکولی طالبات اور 14 اساتذہ کی ہلاکت پر گہرے دکھ اور افسوس کا اظہار کیا اور تمام متاثرین کے اہل خانہ کے ساتھ یکجہتی کا اظہار کیا۔ سپکال نے کہا کہ اس مشکل وقت میں ایرانی عوام کے ساتھ ہمدردی کا اظہار کرتے ہوئے انہوں نے جنگ کے جلد خاتمے اور امن کے قیام کی امید ظاہر کی۔
انہوں نے بتایا کہ تقریباً ایک گھنٹے تک جاری رہنے والی اس ملاقات کے دوران ہندوستان اور ایران کے درمیان قدیم تہذیبی تعلقات پر بھی گفتگو ہوئی۔ دونوں ممالک کے تاریخی روابط اور ان کے اثرات ہندوستانی معاشرے، مراٹھی زبان و ادب اور ثقافتی تبادلے پر بھی تبادلۂ خیال کیا گیا۔ سپکال نے امید ظاہر کی کہ موجودہ جنگی صورتحال کے باعث متاثر ہونے والی ایندھن کی سپلائی چین جلد معمول پر آ جائے گی۔
اس موقع پر قونصل جنرل سعید رضا موسایب متلّغ نے بھی موجودہ جنگی حالات اور اس کے پس منظر میں پیش آنے والے واقعات کے بارے میں تفصیلی معلومات فراہم کیں۔ انہوں نے ایرانی عوام کی ہمت اور ثابت قدمی کا ذکر کرتے ہوئے کہا کہ مشکل حالات کے باوجود ایرانی عوام حوصلے کے ساتھ صورتحال کا مقابلہ کر رہے ہیں۔
ہرش وردھن سپکال نے مزید کہا کہ ہندوستان بدھ اور مہاتما گاندھی کی سرزمین ہے اور یہاں سے ہمیشہ امن، عدم تشدد اور عالمی ہم آہنگی کا پیغام دیا گیا ہے۔ انہوں نے اس بات پر زور دیا کہ دنیا میں امن و استحکام کے قیام کے لیے جنگ کا خاتمہ ناگزیر ہے۔ ملاقات کے اختتام پر ہرش وردھن سپکال نے ایران کے قونصل جنرل کو مہاتما گاندھی کی خود نوشت بطور تحفہ پیش کی۔
