کولی برادری کی بستی میں منھ پر رومال رکھ کر گھومنے والے پیوش گوئل اس سماج کے مسائل بھلا کیا حل کریں گے: سریش چندر راج ہنس
ممبئی: بھارتیہ جنتا پارٹی کے لیڈر و مرکزی وزیر اور شمالی ممبئی لوک سبھا حلقہ سے بی جے پی کے امیدوار پیوش گوئل نے ایک بار پھر جھوپڑپٹیوں و کچی بستی میں رہنے والے غریب لوگوں کی توہین کی ہے۔ شمالی ممبئی کی جھوپڑپٹیوں میں رہنے والے لوگوں کو سالٹ پین کی زمینوں پر بھیج کر علاقے کو جھوپڑ پٹیوں سے پاک کیا جانے سے متعلق انہوں نے بیان دیا ہے۔ پیوش گوئل کو ممبئی کے کولی برادری کے لوگوں کی بستیوں سے گزرتے ہوئے اپنے منھ پر رومال رکھنا پڑتا ہے۔ مچھلی کی بو تک برداشت نہ کرنے والے پیوش گوئل بھلا کولی برادری کے لوگوں کے مسائل کیا حل کریں گے؟ بی جے پی لیڈر پیوش گوئیل پر یہ تنقید کانگریس کے ترجمان سریش چندر راج ہنس نے کی ہے۔
سریش راج ہنس نے کہا ہے کہ پیوش گوئل جھوپڑ پٹی میں رہنے والے غریبوں و کولی برادری کے لوگوں کی نمائندگی نہیں کر سکتے۔ آنے والے لوک سبھا الیکشن میں شمال ممبئی کی عوام پیوش گوئل کو سبق سکھائے بغیر نہیں رہے گی۔
