پانی بل کی عدم ادائیگی پر تھانے میونسپل کارپوریشن کی کارروائی
میونسپل کارپوریشن کی حدود میں 611 پانی کے کنکشن منقطع، 30 موٹر پمپ ضبط
تقریباً 33 کروڑ روپے کی پانی بل کی وصولی
تھانے (آفتاب شیخ)
تھانے میونسپل کارپوریشن نے پانی بل کی وصولی کے لیے پانی سپلائی کے محکمے کے ذریعے کارروائی کا آغاز کیا ہے۔ اس مہم کے دوران اب تک پورے میونسپل کارپوریشن علاقے میں 611 پانی کے کنکشن منقطع کیے گئے ہیں اور 30 موٹر پمپ ضبط کیے گئے ہیں۔ اس پانی بل کی وصولی مہم میں اب تک تقریباً 33 کروڑ روپے کی وصولی کی گئی ہے۔ عوام سے اپیل کی گئی ہے کہ وہ بروقت پانی بل جمع کرکے میونسپل کارپوریشن کے ساتھ تعاون کریں۔
میونسپل کارپوریشن کے پانی بل کی کل رقم تقریباً 224 کروڑ روپے ہے، جس میں سے 76 کروڑ روپے عدم ادائیگی کی مد میں ہیں اور موجودہ سال کے بل کی رقم 148 کروڑ روپے ہے۔ پانی بل کی عدم ادائیگی پر کنکشن منقطع کرکے پانی کی سپلائی بند کرنے کی کارروائی شروع کردی گئی ہے۔ تھانے میونسپل کمشنر سوربھ راو نے اس حوالے سے واضح ہدایات دی ہیں۔
اس پس منظر میں، ایڈیشنل کمشنر سندیپ مالوی نے پانی بل کی ہفتہ وار وصولی کا ہدف مقرر کرکے وصولی مہم شروع کرنے کی ہدایت دی تھی۔ اسی کے مطابق، میونسپل کارپوریشن کے تمام وارڈز میں عدم ادائیگی والے کنکشن منقطع کیے جارہے ہیں، موٹر پمپ ضبط کیے جارہے ہیں اور میٹر روم سیل کیے جارہے ہیں۔ مزید یہ کہ پانی بل ادا نہ کرنے پر منقطع کنکشن دوبارہ بحال کرنے والوں کے خلاف قانونی کارروائی کا بھی اعلان کیا گیا ہے، جس کی اطلاع سب انجینئر وینود پاوار نے دی۔
وارڈ کارروائی وصولی
نوپاڑہ-کوپری: 15 – 4,54,27,325
اتھلسر: 58 – 3,47,32,497
ماجیواڑہ مانپاڑہ: 00 – 6,21,75,459
ورتک نگر: 35 – 2,94,23,710
کلوا: 00 – 2,48,54,228
واگلے: 249 – 1,69,77,654
لوکمانیہ-ساورکر: 37 – 3,00,15,742
ممبرا: 105 – 3,82,72,463
دیوا: 112 – 2,86,96,998
ہیڈکوارٹر-سی ایف سی: 00 – 2,76,60,553
کل: 611 – 33,82,36,629
عدم ادائیگی پر انتظامی چارج میں رعایت
میونسپل کارپوریشن کے علاقے میں گھریلو پانی کنکشن کے بقایہ بل کی مکمل ادائیگی پر انتظامی چارج میں 100 فیصد رعایت دی جائے گی، جس کی منظوری میونسپل کمشنر سوربھ راو نے دی ہے۔ بقایہ بل پر جرمانہ میں 100 فیصد رعایت کا اعلان کیا گیا ہے، جس سے شہریوں کو مالی راحت ملے گی اور انہیں اس منصوبے سے فائدہ اٹھانے کی اپیل کی گئی ہے۔ یہ اسکیم یکم ستمبر 2024 سے 31 مارچ 2025 تک نافذ العمل ہوگی۔ اس دوران شہری بقایہ اور جاری پانی بل کی مکمل ادائیگی کرکے 100 فیصد رعایت حاصل کرسکیں گے۔ یہ رعایت ان گھریلو صارفین کے لیے ہوگی جنہوں نے اسکیم کے نفاذ سے پہلے بل ادا نہیں کیا ہوگا، جبکہ یہ اسکیم کاروباری صارفین کے لیے لاگو نہیں ہوگی۔
