وزیر تعمیرات عامہ شیویندر سنگھ راجے بھوسلے نے مختلف ترقیاتی منصوبوں کا جائزہ
یکم اگست( ورق تازہ نیوز)ریاستِ مہاراشٹر کے تعمیرات عامہ (سرکاری ادارے مستثنیٰ) کے وزیر شیویندر سنگھ راجے بھوسلے نے ناندیڑ شہر کی سڑکوں کے کام جلد از جلد مکمل کرنے کی ہدایت دیتے ہوئے کہا کہ میونسپل کارپوریشن اور تعمیرات عامہ محکمہ باہمی ہم آہنگی کے ساتھ شہری سڑکوں کے کام مکمل کریں تاکہ عوام کو کسی قسم کی تکلیف نہ ہو۔آج سرکاری گیسٹ ہاوس میں منعقدہ جائزہ اجلاس کے دوران وزیر موصوف نے تعمیرات عامہ بورڈ کے تحت جاری مختلف ترقیاتی منصوبوں کا تفصیلی جائزہ لیا۔
اس موقع پر رکن پارلیمان ڈاکٹر اجیت گوپچھڑے، میونسپل کمشنر ڈاکٹر مہیشکمار دوئیفوڑے، چیف انجینئر سنبھاجی دھوترے، ایگزیکٹیو انجینئر رام کرشن گلدار، پربھنی، ہنگولی، بھوکر اور دیگلور کے متعلقہ افسران بھی موجود تھے۔وزیر تعمیرات عامہ نے واضح کیا کہ ضلع میں جہاں سڑکیں انتہائی خراب حالت میں ہیں، خاص طور پر زیارت گاہوں اور اہم راستوں پر ترجیحی بنیادوں پر کام شروع کیا جائے۔ انہوں نے کہا کہ ہر سال مرمت ہونے والی سڑکوں پر جدید ٹیکنالوجی کا استعمال کرتے ہوئے پائیدار مرمت کی جائے۔
انہوں نے درخت لگانے کے ساتھ ساتھ ان کے تحفظ پر بھی زور دیا۔ نیز، سڑکوں پر رہنمائی بورڈز لگانے، پولیس کالونی کی عمارتوں کی مرمت، کنوٹ-ہدگاوں روڈ، شہر کے چوراہوں کی خوبصورتی، شیواجی نگر کے ڈرینج سسٹم، اور ٹول ناکوں پر جعلی رسیدوں کے مسئلے جیسے اہم معاملات فوری حل کرنے کی ہدایت بھی متعلقہ افسران کو دی۔انہوں نے کہا کہ حکومت کی 100 روزہ مہم کے دوران محکمہ تعمیرات عامہ نے شاندار کام کیا ہے اور آئندہ 150 روزہ مہم میں بھی محکمہ کو سرفہرست رکھنا سب کی ذمہ داری ہے۔ اس موقع پر سنبھاجی دھوترے نے ناندیڑ، پربھنی اور ہنگولی اضلاع میں مجوزہ ترقیاتی منصوبوں، افرادی قوت اور خالی اسامیوں کے بارے میں پریزنٹیشن پیش کیا۔
تخت حضور صاحب گوردوارہ میں درشن اور روایتی اعزاز:وزیر تعمیرات عامہ شیویندر سنگھ راجے بھوسلے نے آج تخت حضرت صاحب گوردوارہ پہنچ کر مقدس گرو گرنتھ صاحب کے درشن کیے۔ گوردوارہ بورڈ کی جانب سے ان کا روایتی طور پر کیسری چولا اور شروپا پیش کر کے استقبال کیا گیا۔ اس موقع پر رکن پارلیمان ڈاکٹر اجیت گوپچھڑے اور دیگر معززین موجود تھے۔
عدالت کی نئی عمارت کا معائنہ:ناندیڑ کے کوٹھا-اسرجن علاقے میں زیر تعمیر عدالت کی نئی عمارت کے کام کا وزیر تعمیرات عامہ شیویندر سنگھ راجے بھوسلے نے معائنہ کیا۔ انہوں نے تعمیراتی کام کی پیش رفت کا جائزہ لیا۔ اس دوران رکن پارلیمان ڈاکٹر اجیت گوپچھڑے اور متعلقہ افسران بھی ان کے ہمراہ تھے۔