ناندیڑ، 13 نومبر (ورق تازہ نیوز)ناندیڑ دیہی پولیس نے غیر قانونی ریت مافیا کے خلاف ایک بڑی کارروائی انجام دیتے ہوئے ایک کروڑ، انتالیس ہزار، چار سو روپے مالیت کا مال ضبط کیا ہے۔ یہ کارروائی پولیس سپرنٹنڈنٹ محترم اویناش کمار کی رہنمائی میں ’’آپریشن فَلاش آؤٹ‘‘ کے تحت انجام دی گئی۔
ذرائع کے مطابق پولیس کو خفیہ اطلاع موصول ہوئی تھی کہ گوداوری ندی کے کنارے مختلف مقامات پر غیر قانونی طور پر ریت کی کھدائی اور نقل و حمل کی جارہی ہے۔ اطلاع کی بنیاد پر پولیس نے کالیشور، وشنوپوری، مارکاڈ، پمپلگاؤں بھنگی، واہےگاؤں، گنگابیٹ اور کللال کے علاقوں میں چھاپے مارے۔
پولیس کی ٹیم نے علی الصبح 4 بجے سے دوپہر 12 بجے کے درمیان یہ کارروائی انجام دی۔ کارروائی کے دوران ریت مافیا کے افراد ندی کے بیچ میں بَوٹس اور ترافو کے ذریعے ریت نکالتے ہوئے پائے گئے۔ کچھ ملزمان پولیس کو دیکھ کر فرار ہو کر کھیتوں میں چھپ گئے، جنہیں ڈرون کی مدد سے تلاش کر کے گرفتار کیا گیا۔
اسی دوران کچھ انجِنز کو چھپایا گیا تھا، جنہیں بھی ڈرون کی مدد سے برآمد کیا گیا۔ موقع پر موجود کچھ غیر قانونی سامان کو ندی میں جلا کر یا ڈبو کر تلف کیا گیا، جب کہ باقی مال پولیس نے تحویل میں لیا۔
ضبط شدہ مال کی تفصیل:
7 انجِنز، مالیت: ₹21,00,000
109 ترافو، مالیت: ₹54,50,000
3 بَوٹس، مالیت: ₹21,00,000
32 لوہے کے ڈرم، 19 پلاسٹک ڈرم، 39 پائپ، 45 برَس ریت، ٹوکرے، بیلچے وغیرہ۔
کل مالیت: ₹1,00,39,400 (ایک کروڑ انتالیس ہزار چار سو روپے)
ملزمان کی تفصیل:
اس کارروائی میں 9 بہاری مزدور اور 10 مقامی مالکان کے خلاف مقدمہ درج کیا گیا ہے۔ ان میں سے 10 افراد کو گرفتار کرلیا گیا ہے۔ گرفتار ملزمان میں بہار اور اترپردیش کے مختلف اضلاع سے تعلق رکھنے والے مزدور شامل ہیں، جب کہ مقامی مالکان کا تعلق ناندیڑ کے مختلف دیہاتوں جیسے گنگاویٹ، پمپلگاؤں، کللال، وشنوپوری، واہےگاؤں وغیرہ سے ہے۔
قانونی کارروائی:
ملزمان کے خلاف دفعہ 303(2)، 3(5) تعزیراتِ ہند کے تحت اور مہاراشٹر زمین محصول ایکٹ کی دفعہ 48(7) اور 48(8) کے مطابق مقدمہ درج کیا گیا ہے۔
اس کامیاب کارروائی میں پولیس انسپکٹر اومکांत چنچولکر، سب انسپکٹر مٹھواڈ، کسمے، مرکزے، موندے، پاچلنگ، پوار، کلیانکر، لاورے، پیناپلے، چاوری، بھیسے، شیکھ جمیل، شیکھ آصف، اور دھمّپال کامبلے سمیت ناندیڑ دیہی پولیس اسٹیشن کے متعدد اہلکاروں نے حصہ لیا۔
سپرنٹنڈنٹ پولیس اویناش کمار نے کارروائی انجام دینے والے افسران و عملے کی ستائش کرتے ہوئے کہا کہ ریتی مافیا کے خلاف پولیس کی یہ مہم آئندہ بھی جاری رہے گی تاکہ عوامی وسائل کا غیر قانونی استحصال روکا جاسکے۔