ناندیڑ :4/اگست ۔ (ورق تازہ نیوز )ضلع میں سنگین نوعیت کے جرائم میں مفرور ملزمان کی گرفتاری کے لیے سپرنٹنڈنٹ آف پولیس ڈاکٹر نیلابھ روہن کی ہدایت پر مقامی کرائم برانچ کی جانب سے خصوصی مہم جاری ہے۔ اسی مہم کے تحت وزیر آباد پولیس اسٹیشن میں درج قتل کے مقدمہ نمبر 302/2026 کے مفرور ملزم کو گرفتار کرنے میں کامیابی حاصل کی گئی ہے۔
پولیس کے مطابق 21 جون 2026 کو رات تقریباً 2:05 سے 2:10 بجے کے درمیان برکت پورہ۔واردھا روڈ پر واقع ابرار فنکشن ہال کے قریب شیخ شمیم شیخ اسحاق اپنے ایک دوست کے ساتھ بیٹھے ہوئے تھے۔ اسی دوران دو موٹر سائیکلوں پر سوار چار نامعلوم افراد وہاں پہنچے اور ان پر جان لیوا حملہ کر دیا۔ حملہ آوروں نے پہلے فائرنگ کی، اس کے بعد تلوار اور خنجر سے متعدد وار کیے، جس کے نتیجے میں وہ شدید زخمی ہوگئے۔ علاج کے دوران ان کی موت واقع ہوگئی۔
اس واقعہ کے سلسلے میں وزیر آباد پولیس اسٹیشن میں مقدمہ نمبر 302/2026 کے تحت بھارتیہ نیائے سنہتا کی دفعات 103(1)، 3(5) اور آرمس ایکٹ کی دفعات 3/25، 4/25 اور 7/25 کے تحت مقدمہ درج کیا گیا ہے۔
3 اگست 2026 کو پولیس سب انسپکٹر مہیش کورے اپنی ٹیم کے ساتھ مفرور ملزمان کی تلاش میں ناندیڑ شہر میں گشت کر رہے تھے۔ اسی دوران بھاگیہ نگر پولیس اسٹیشن کی حدود میں قابل اعتماد خفیہ اور تکنیکی اطلاع ملی کہ مذکورہ مقدمے کا مفرور ملزم مرزا شبّر بیگ مرزا غفار بیگ، عمر 42 سال، پیشہ مزدوری، ساکن کھڑک پورہ، ناندیڑ، گروجی چوک کے علاقے میں موجود ہے۔
اطلاع کی تصدیق کے بعد مقامی کرائم برانچ کی ٹیم نے فوری کارروائی کرتے ہوئے ملزم کو حراست میں لے لیا۔ پوچھ گچھ کے دوران اس نے اپنی شناخت کی تصدیق کرتے ہوئے قتل کے مذکورہ مقدمے میں مفرور ہونے کا اعتراف بھی کیا۔
پولیس کے مطابق ملزم گزشتہ تقریباً ڈیڑھ ماہ سے مسلسل اپنی رہائش تبدیل کر رہا تھا، جس کی وجہ سے وہ پولیس کی گرفت سے باہر تھا۔ تاہم خفیہ معلومات کے مؤثر تجزیے کے بعد مقامی کرائم برانچ نے اس کا سراغ لگا کر اسے گرفتار کر لیا۔ بعد ازاں مزید قانونی کارروائی کے لیے ملزم کو وزیر آباد پولیس کے حوالے کر دیا گیا۔
پولیس نے عوام سے اپیل کی ہے کہ اگر کسی شہری کے پاس مذکورہ ملزم کے خلاف کوئی شکایت، معلومات یا شواہد موجود ہوں تو وہ فوری طور پر وزیر آباد پولیس اسٹیشن یا ناندیڑ ضلع پولیس سے رابطہ کریں۔
یہ کارروائی سپرنٹنڈنٹ آف پولیس ڈاکٹر نیلابھ روہن کی ہدایت پر ڈپٹی سپرنٹنڈنٹ آف پولیس رامیشور ویجنے کی نگرانی میں مقامی کرائم برانچ، انسدادِ بھتہ خوری دستہ اور سائبر سیل کی مشترکہ ٹیم نے کامیابی سے انجام دی۔
ناندیڑ ضلع پولیس نے واضح کیا ہے کہ سنگین جرائم میں مفرور ملزمان کی گرفتاری کے لیے خصوصی مہم آئندہ بھی جاری رہے گی اور ایسے ملزمان کے خلاف سخت قانونی کارروائی عمل میں لائی جائے گی۔